Mga self-righteous sa bakuna

Nakontrobersyal ang pag-angkon sa pangulo sa Presidential Security Group o PSG nga naturokan na sila og COVID-19 vaccine.

Katarungan nila nga gikinahanglan kini tungod kay naa kanila ang kaluwasan sa presidente isip close-in security niini.

Duna pud bayay punto sila aron maka-perform ang PSG sa ilang tahas mas maayong makaseguro sila nga wala silay COVID-19.

Apan nabulit hinuon sila sa mga pagsaway ug gikwestyon asa sila nag kuha og bakuna, pinalusot o smuggle nga dakong illegal ug uban pa nga mga issue.

Gani duna nay mga inbestigaayon nga gipahigayon apil na ang balay balaoran niapil na sa issue nga mag imbistigar sad in aid of legislation.

Pastilan daghan kaayong mga self-righteous nga moingon nga dili sakto ang gihimo sa PSG kay wala moagi sa FDA ang bakuna ug angayan nga taktakon o mo-resign ang pangulo sa PSG.

Naa bay nadaut nga sakop sa PSG human naturokan og COVID-19 vaccine? Wala man seguro. Kong naa man diha seguro angayan nga mokyawkyaw ang mga kritiko.

Dili nalang ta magminaut seguro bisan kinsa nga adunay kahigayonan o katakos nga protehian ang kaugalingon ug ang mga tawo sa palibot nato buhaton pud seguro nato ang gihimo sa PSG.

Sa nahitabo karon nga dili kasarangan ang atong kontra ang tanan maneguro gyud, nahitabo lang nga ang PSG dunay kontak o katakos nga magpabakuna.

Karon nga mitingog na ang presidente nga andam niyang panalipdan ang PSG gikan sa posibleng pag-prosecute kanila, dili niya ipatambong sa mga hearing aduna pa kahay mahimo ang mga labot laboton.

Mas maayo pa tutokan nalang ang pagpadali sa pagkuha og vaccine kay sa pag-usik-usik sa oras sa mga walay hinungdan nga issue.

Mas maayo ipadali nila ang pagresolbar sa mga kaso sa kurapsyon nga naglambigit sa mga ahensiya sa kagamhanan sama sa PhilHealth

Labaw sa tanan tutokan ang pagdepensa sa nasod aron dili masudlan og bag-ong strain sa COVID-19.