Miresulta na

Dili na angay’ng lalisan pa, kon dili gani nato tumanon ang gimando nga physical distancing, sigurado gyud nga i-lockdown pagbalik sa kagamhanan ang atong mga dapit.

Kon mahitabo kini, mosamot ang atong kalisud kay pangsirad-an na man usab pagbalik ang mga miabli na unta nga mga balay-patigayon ug wa na sab mo’y trabaho.

Dinhi sa Dakbayan sa Sugbo, gamay na lang gyud unta kaayo ang “active cases” sa coronavirus disease, sa ato pa pila na lang ka tawo ang anaa sa ospital ug quarantine centers.

Apan tungod kay atol sa Pasko ug Bag-ong Tuig, daghan man gyud ang nagpahigayon og party ug pundok-pundok, unya wa magsul-ob og facemask, aw dunay nangatakdan og virus.

Niabot na man lang unta kadto sa 76 ang active cases dinhi sa siyudad, apan misaka kini pagbalik og dul-an na usab sa 200 ka active cases pagka karon.

Timan-i ninyo nga dili makahatag ang kagamhanan og suporta nga pagkaon sa katawhan kon i-lockdown ang atong mga dapit, mao nga kinahanglang moabag kita nga dili unta mosaka pagbalik ang mga kaso sa COVID-19.

* * *

Grabeha sa pagsugat sa Bag-ong Tuig dinhi sa Dakbayan sa Sugbo kay dunay pagpang-ambush nga nahitabo ug ilado pa nga tawo ang gipatay.

Sayonan ka nga ang gipatay mao man si Ruben Feleciano nga milansar kaniadto pagkamayor sa lungsod sa San Fernando?  Naapil pa nga nasamdan sa pagpamusil ang iyang pag-umangkon. Ang pagpamusil nga nahitabo dili layo sa usa ka simbahan sa Barangay Apas nahitabo atol gyud sa Bag-ong Tuig ug nakamaneho gyud pag-ikyas ang mga kriminal.

Unya, didto sa Inayawan, Dakbayan sa Sugbo, gipatay sab ang usa ka kanhi tanod sa maong barangay. Luoy kaayong tan-awon kay ang iyang anak, nagsapnay sa nagkadugo niya nga amahan. Kon ngano nga gipatay si Feliciano ug kadtong tanod, wa pa kini mahibaw-i sa kapolisan nga naglisud pagsulbad sa maong pagpamusil.

* * *

Sa ubang mga dapit sa nasud ug sa laing kanasuran, gipreserbar gyud nila ang ilang mga historical sites. Ang mga tunnel nga gihimo sa mga Hapon atol sa 2nd World War angay gyud unta nga ipreserbar sa atong kagamhanan.

Daghan sa mga Japanese Tunnel ang ania sa Dakbayan sa Sugbo apan subo lang kay ang uban gipangguba ug ang uban gihimo nga mga septic tank sa katawhan. Duol sa Marco Polo Plaza Hotel ug sa Banawa, Guadalupe, dunay duha ka dagkong tunnel nga gihimong ospital sa mga Hapon, apan wa na kini karon. Kon konsehal pa ko sa siyudad, pahimoan ko kini og balaod nga dili mahimong gub-on ang maong mga tunnel.