Expectation vs reality sa Sinulog 2021
Human na ang Pasko ug bag-ong tuig ang Sinulog 2021 na usab ang atong giatangan dinhi sa Sugbo. Apan lahi na sa naandan ang atong pagsaulog sa kapistahan sa dakbayan sa Sugbo.
Virtual ang halos tanang kalihokan sa Sinulog festival diin makita pinaagi sa mga online portal sama sa Sinulog performances.
Matud ni Vice Mayor Michael Rama, chairman sa Sinulog Foundation Inc., nga 99 porsiento na nga andam ang tanan alang sa cultural activities sa Sinulog.
Unsa man ang uno porsiyento nga nahabilin? seguro ang execution nalang alang sa Sinulog karong tuiga.
Ipahigayon ang Sinulog performance sa mga contingents sa South Road Property dapit sa dakong mall. Nindot paminawon nga masaksihan gihapon ang mga kalihokan bisan dili sama kaniadto pero napangitaan og pamaagi nga mapadayon gihapon.
Pero basin mahulog kini sa expectation versus reality, nagdahum kita nga hapsay ra nga mapahigayon ang Sinulog activities apan aduna diay dakong isyu nga atubangon sa pagpadayon nini.
Hinuon wala pa man kaayo ko kakuha og detalye unsay pamaagi, granting nga walay live audience ang Sinulog showdown apan ang mga contingents maseguro ba nga dunay social distancing? Pila man sila ka buok apil na ang mga molangkob sa support group?
Kong atong ipanag-ing sa mga taping sa programa o teleseries sa telebisyon naa silay gitawag nga lock in taping diin gipaubos silang tanan sa swab test apil na ang production staff.
Ma-apply kaha kini sa mga Sinulog contingents? Ibutang ta lang nga adunay napulo ka mga local contingents ang mo perform ug adunay 70 ka dancers and support crew, pila na ang sumada sa mga Sinulog participants ang magdasok unya sa venue?
Sa relihiyosong kalihokan, gisuspend ang tanan apil ang fluvial diin ang misa lang ang gitugotan.
Dili malimod ang kamatuoran nga magdasok gyud ang mga performers unya sa Sinulog showdown.
Tugotan kaha kini sa IATF? Karon pa lang daan nakita na nako ang sangpotanan aning tanan.
Kong gipasakaan og kaso kadtong mga kapitan sa barangay nga mitugot sa mini Sinulog sa fiesta sa kapilya, unsa man ang kalainan nila sa mga opisyal sa dakbayan?
- Latest