Bag-ong paglaum

Hingpit na gyud kitang nakatikang sa bag-ong tuig alang sa pag-atubang sa mga bag-ong hagit. Tanang katawhan seguro nangandoy nga moabot na karong tuiga tungod usab sa kapait nga kasinatian sa nakalabayng tuig nga gimugna sa pandemic.

Kong pwede pa lang ilubong sa kalimot ang dautang damgo sa tuig 2020 gihimo na kana nato.

Apan dili gyud nahimong hikalimtan sanglit anaa pa man kita karon sa sakit nga kamatuoran nga wala pa kita hingpit nakalingkawas sa coronavirus.

Gani kong sa damgo pa wala pa kita nakamata gikan  sa urom nga naghamok kanato busa manglimbasog kita nga makamata uban sa paglaum nga ok na ang tanan.

Bitaw, ang bag-ong tuig himoon natong inspirasyon alang sa bag-ong paglaum nga atong pagahuptan alang sa atong pagpakabuhi.

Dili man nato makalimtan ang mapait nga kasinatian sa nakalabay’ng tuig apan mahimo nato kining kapanaminan o kakuhaan og pagtulon-an sa pagahimoon nato karon.

Survival ang usa sa lig-on natong  nakat-onan, nakasugakod kita hangtod karong  panahona tungod sa mga gihimo nato nga wala kita magpapilde sa kahadlok sa kontra nga dili makita.

Bisan nag-atubang kita sa chapter 2 o sequel sa COVID-19 kay nag-mutate naman pud ang kagaw, palig-onon usab nato ang atong depensa sa kaugalingon.

Labaw sa tanan ang atong pag-ampo sa Ginoo kay anaa Siya kanunay nagsapnay kanato.

Sugaton nato kining tuiga nga puno sa paglaum bawon ang mga leksiyon sa nakalabayng panahon.

Bag-ong Tuig Bag-ong Paglaum!