EDITORYAL - Klarong impormasyon lang unta

Makalibog kanunay kining mga polisiya sa gobiyerno kabahin sa COVID-19 response niini tungod sa walay klarong komunikasyon sa mga opisyales nga gitahasan paghimo sa ilang tagsatagsa ka trabaho. Ang tanan gustong mahimong tigpamaba, hinungdan sa kalibog sa mga tawo kung kinsay tuohan.

Ang Department of Health daan nang miingon nga wala pay giaprubahang bakuna batok sa COVID-19 dinhi sa nasud. Ug ang Food and Drugs Administration lang maoy gitahasan sa balaod nga moaprubar niini ug kun dunay makalusot ug mogamit niini nga way pagtugot gikan sa maong ahensiya makonsiderar kining paglapas sa balaod.

Apan ngano mang dunay nakalusot nga bakuna nga gigamit sa mga sundalo. Ug nganong moinsister man ang pipila ka opisyales nga way nalapas nga balaod sa maong pagpabakuna? Sa ato pa mas molabaw pa ang ilang rason kaysa sa balaod?

Ang labing bag-ong mis-komunikasyon sa mga opisyales mao kining bahin sa travel ban sa mga langyaw gikan sa 20 ka mga nasud nga dunay mga kaso sa UK coronavirus strain.

Ang Manila International Airport Authority nga - maoy nagsilbing gwardiya sa ganghaan o pultahan sa nasud tungod kay halos tanang international flights naa diha motugpa - unang mipagawas og pahibalo pinaagi sa social media sa ilang pag-ban sa 19 ka mga nasud puno sa United Kingdom diin magagikan ang UK coronavirus strain.

Dinhi nagsugod ang kalibog sa dihang ang tigpamaba sa Palasyo, Harry Roque, miingon nga walay travel ban, kung duna man, basin tingali ug unsay mga detalye (hinungdan).Tungod niini, gitangtang sa MIAA ang ilang pahibalo sa social media.

Kinahanglang klarohon unta sa mga opisyales sa gobiyerno kining ilang trabaho ilabi na ang pagsabwag og impormasyon aron dili makadugang sa problemang gisagubang tungod aning pandemiya.