Ahat

Taliwa sa kadako pa sa trabahoon, napugos ang dakbayan sa Sugbo pag-abli sa Cebu City Medical Center niadtong Lunes.

Apan tataw nga ang nahitabong inagurasyon kutob ra sa pasundayag ug pagsalbar sa dakong kauwawan sa mga opisyal sa dakbayan nga mipasalig nga mabuksan na ang bag-ong building sa CCMC sa dili pa matapos ang tuig.

Ang realidad mao nga dili pa gyud angayang gamiton ang maong building hangtud nga masiguro ang kaluwasan sa mga trabahante sa tambalanan lakip na sa mga pasyente.

Gani ang mga opisyal sa dakbayan sa Sugbo miangkon nga wala pa silay occupancy permit gikan sa Office of the Building Officials (OBO).

Ang maong permit gikinahanglan sa dili pa puy-an o akupahon ang usa ka edipisyo.

Kini pagsiguro nga nasusi na sa mga tinugyanan sa OBO ang kaluwas sa maong edipisyo.

Mismo ang hepe sa OBO miangkon nga wala pa nila masusi ang building hangtud niadtong adlaw nga kini ginagurahan.

Si City Administrator Floro Casas hinuon miingon nga duna nay inspection nga nahitabo niadtong Martes ug nga gilihok na ang partial occupancy permit niini.

Wala hinuon ni nagpasabot nga luwas na gyud ang maong building nga gamiton.

Kun imong tan-awon ang bag-ong CCMC building, nabulit pa ni sa mga tubo nga gigamit isip mga damba.

Kini tungod kay dako pa ang trabaho nga nagpadayon hangtud karon.

Kun gamiton gyud sa dakbayan ang unang tulo ka andana sa building bisan nagpadayon pa ang trabaho sa ibabaw nga mga andana, dili ba mabutang sa dakong piligro ang mga pasyente ug mga kawani niini?

Nganong iahat man sa dakbayan sa Sugbo ug ikompromiso ang siguridad sa publiko?

Aron lang gamiton sa propaganda nga kunohay natuman ang ilang saad?

Mas mahinungdanon ang kaluwasan sa publiko kay sa garbo ni bisan kinsang opisyal sa dakbayan sa Sugbo.

Inay athon sa paggamit ang building nga di pa gyud luwas, tingali mas maayong sigurohon nalang sa mga opisyal sa dakbayan nga madali gyud paghuman ang katukuran niini aron sa ingon luwas nga magamit sa publiko.