Likay sa aso!

Pagkapaspas gyud nga mosibog sa panahon, kay karon mao na ang katapusang adlaw sa tuig.

Karong tungang gabii, igo na lang kita nga molingi sa mga panghitabo sa tuig 2020, dungan sa panghinaot nga nindot unta ang atong kaugmaon sa tuig 2021.

Ang uban, nangandam na og 13 ka lainlaing matang sa prutas nga lingin, aron ibutang nila sa ilang lamesa, kay nagtoo sila nga pinaagi niini moasenso ang kahimtang.

Pero husto ang gisulti sa akong mga amigo, nga bisan ibton pa nimo ang punoan sa maong mga prutas ug ibutang sa imong lamesa, dili ka gyud mouswag kon dili usab nimo ubanan og paninguha.

May kaila ko nga kon way trabaho magtungok, maghinuktok, kay kutoy ang tiyan. Apan kon may mopatrabaho kaniya, dili pa gani makasugod pagtrabaho, mo-cash advance na.

Unya, inigsugod og trabaho, cash advance sa buntag, udto ug hapon. Sa laktud, ang iyang cash advance mosubra pa sa iyang sweldo ug dunay higayon nga layasan niya ang iyang trabaho kay wa na man siya’y makubra pa.

Ang angay’ng himoon mao nga dili gyud unta kita mogasto og subra sa atong kinitaan, aron nga dili maputos sa utang ug makab-ot nato ang kalamboan.

* * *

Sa miaging Pasko, abi ko ba og wa gyuy magpabuto og mga rebentador kay apiki man gyud karon ang panginabuhi sa daghang katawhan.

Apan karong gabii, sigurado ko nga makabungog lang gihapon ang buto-buto sa mga rebentador. Nabatasan na man gud sa katawhan nga magpabuto sa pagsugat sa Pasko ug Bag-ong Tuig, apan sigurado ko nga wa sila makasabot kon ngano ni.

Ginaingon man gud nga didto kuno sa ubang nasud, sama sa China, nagtuo sila nga ang pagpabuto og rebentador makaabog sa mga daotang espiritu nga maghatag kanila og dangan sa panginabuhi.

Buyno, way problema kon sugaton nato ang Bag-ong Tuig pinaagi sa pagpabuto og mga rebentador, apan ayaw lang ninyo gastoha ang para sa bugas ug ubang pagkaon.

Ako hinuon, nahuman na ko niining maong “stage” sa kinabuhi nga malipay’ng magpabuto sa pagsugat sa Pasko ug Bag-ong Tuig.

Nakasabot na ko nga dili maayo ang pagpabuto, kay ang mga aso sa pulbora, makahatag og kadaot sa imong panglawas.

Aw, hinuon, kon may magpabuto sa imong silingan, makahanggap ka gihapon og aso gikan sa ilang gipabuto, apan ako manirado man ug naa ra sa kwarto.

Tambag nako sa mga hubakon, likayi nga makahanggap ka og aso gikan sa mga rebentador kay sigurado gyud nga maglisud ka pagginhawa.

Lisud ra ba kaayo ron ang pagpa-admit sa ospital, mao nga toohi gyud ninyo ning akong tambag. Happy New Year!!