Malipayong Bag-ong Tuig

Pipila ka adlaw gikan karon, ato nang hangpon ang lain nga bag-ong tuig. Ambot unsa kahay nagpaabot nato sa unahan.

Apan manghinaut lamang kita nga mas maayo ang dagan sa atong kinabuhi sa atong paghangop sa lab-as nga tuig.

Ug sa ato unya nga pagtikang ngadto sa tuig 2021, puno kita sa mga pangandoy nga unta buligan kita sa maayong kapalaran ug nga makabaton kita og mas daghang grasya gikan sa kahitas-an kay sa tuig nga atong gitalikdan.

Siguro kitang tanan dinhi sa kalibotan gusto gayud nga kalimtan sa dayon ang mga panghitabo sa tuig 2020. Kining maong mga panghitabo adunay hilabihan ka dako ug seryoso nga epekto sa tagsatagsa nato ka kinabuhi.

Apan, bisan pa man niini, dili gayud nato mahimong makalimtan ang mga panghitabo sa tuig 2020. Kun kita lamang ang magbuot, dili gani kita gusto nga mahitabo kadtong makalilisang nga pandemiya nga misakdap sa kalibotan.

Ang coronavirus disease o COVID-19 mao ang labing dakong katalagman nga mihapak sa kalibotan sulod sa milabay nga usa ka gatus ka tuig. Sa pagdagmal niini, daghang ekonomiya, bisan pa niadtong mga adunahang nasud, ang nahagba.

Gani ang Pilipinas ang usa sa mga nasud nga grabe nga naapektohan sa maong balatian. Gatusan ka libo ka mga Pilipino ang natakboyan niini diin hapit sa napulo ka libo na ang walay swerte nga nawad-an gayud sa ilang kinabuhi.

Dili lamang kana. Liboan ka negosyo, ilabina niadtong mga small and medium enterprises, ang mihunong sa ilang operasyon gumikan sa pagkalugi. Gumikan niini, milyones ka trabahante ang nakulban intawon sa kaldero.

Ang nakapagrabe niining maong pandemiya mao nga wala pay tambal nga nakaplagan sa mga eksperto batok niini.

Hinuon nagmaya kita tungod kay aduna nay mga bakuna nga nahimo batok sa COVID-19. Apan wala pa matino ang kaepektibo niini pagsagang sa coronavirus.

Gitagna sa mga eksperto sa medisina ug panglawas nga tungod kay wala pay tambal nga nadiskobrehan batok sa coronavirus disease, taas pa ang panahon ang atong sagubangon una mahibalik ang normal nga sitwasyon.

Apan bisan pa niining naglagiting nga katalagman nga atong nasinati karon, ato lamang ihangad ang tanan ngadto sa kahitas-an uban ang pangandoy nga unta makabaton kita og haruhay ug mabungahon nga 2021, layo sa makalilisang nga eksperyensiya nga atong naagian sa tuig 2020.

Malipayong Bag-ong Tuig kanatong tanan.