Ang estado sa druga Part I

Sa tuig 1972, nagsugod pa lamang ang suliran sa ginadili nga drugas. Dinhi, 20,000 pa lang ang mga adik tibook nasud. Tuig 1982, midaghan ang mga tiggamitan og ginadiling drugas.  

Tuig 1990, migrabe ang suliran sa ginadiling drugas kun hisgotan ang gilapdon sa iyang operasyon. Sa hinapos nga bahin ning tuiga nahimo nang producer ug exporter og shabu ang Pilipinas.

Tuig 2003, ang Pilipinas aduna nay 1.8 ka milyon nga migamit sa gidiling drugas o katumbas sa 2.2 porsiyento sa kinatibok-ang papolasyon sigun pa sa 2003 International Narcotics Control Strategy Report.

Tuig 2012, ang Pilipinas nakakuha sa pinakataas nga ranking sa mga nasud nga tiggamitan og shabu sa mga nasud sa East Asia.

Moabot sa 2.2 porsiyento ka mga Pilipino nga nag edad tunga-tunga sa 16 ug 64 ang tig gamitan og shabu matud pa sa United Nations.  

Ang 2015 Nationwide Survey on the Nature and Extent of Drug Abuse in the Philippines” nga gikomisyon sa Philippine Dangerous Drugs Board (DDB), ug gipatuman sa “Resources, Environment and Economic Centre for Studies, Inc. (REECS) nga gipagawas niadtong tuig 2016 mibana-bana sa merkado sa drugas sa nasud nga anaa sa P55.8 billion o US$1.1 billion sa kada tuig nga konsumo o 16,138 kilograms sa iyang gidaghanon.

Ang DDB mao ang ahensiya sa gobiyerno nga gimandoan sa paghimo og mga palisiya kalabot sa ginadili nga drugas.

Ang pagtuon nagtug-an nga ang nasud adunay 1.8 milyones ka tiggamitan og ginadili nga drugas ug 4. 8 milyones ka mga adik na sa tibuok nilang kinabuhi.

Ang pagtuon nag ingon nga sa Metro Manila lamang 99 porsiyento sa mga barangay may nagpuyo nga usa ka adik ug ang prevalence sa pamilya nga may sakop nga migamit og ginadili nga drugas anaa sa 2.6 porsiyento.