EDITORYAL - Maayong Pasko sa tanan!

Unyang tungang gabii sugaton sa mga Pilipino ang pagkatawo sa Batang Manunubos. Ning adlawa usab masentro ang kabililhon sa pamilya, magtapok ang mga banay sa panimalay ug magbinayloay og mga malipayong balita.

Dunay uban nga nakasinati og dili maayong kasinatian karong tuiga nga dunay pandemiya sa COVID-19 magtapok lang gihapon aron mamudyot sa kung unsay nahibilin human sa sakit ka pagkawala sa miyembro sa ilang pamilya ug aron paningkamotang mabalik sa normal ang ilang mga kinabuhi.

Apan sa pagsaulog sa Pasko, dili unta kalimtan ang leksiyon nga gihatag sa maong salot sa panglawas, nga dili kini kakumpiyansahan tungod kay kinabuhi ang nakasugal.

Kutob sa mahimo, likayan lang gyud una ang pagdawat og mga bisita gikan sa laing lugar kung gusto sa tanan nga makatabok ning tuiga nga way nagkasakit og COVID-19 sa ilang banay.

Limitahan lang una ang naandang pakig-uban-uban o tapuk-tapok sa mga higala ug mga silingan, ug labaw sa tanan kinahanglang sundon ang tanang gipatumang minimum health protocols sa Department of Health aron masiguro ang kaluwasan sa tanan.

Angay ibutang sa hunahuna nga peligro kaayong dunay usa sa miyembro sa pamilya nga makakuha sa maong sakit ug madala kini sa panimalay. Hangtud wa pay bakunang makasanta sa maong sakit dili gyud maayong mokumpiyansa.

Ang DOH-Central Visayas ug ang gobiyerno nabalakang tungod sa selebrasyon mosaka gyud ang mga kaso sa COVID-19, maayo unta og dili kamo o miyembro sa pamilya ang mapuno sa mga listahan, apan malikayan kini kung motuman lang sa kamandoan.

Gahinan og oras ang pag-ampo kauban sa pamilya aron pagpasalamat sa kung unsa mang mga grasyang nadawat. Angay sab ipasalamat bisan ang mga pagsuway ug kagul-anan tungod kay ang tanang mga nanghitabo sa kinabuhi sa tawo giplano nang daan sa Ginoo.

Tugoti kami dinhi sa Banat News sa pag-ingon: Maayong Pasko kanatong tanan.