Ang walay kahadlok

Sigun sa talaan sa Department of Health-7 nga napatik sa pamantalaang The Freean, gipakita nga ang mga nag edad og 21 hangtod 30 mao ang nag-una sa pagpakuyanap sa coronavirus aron manakod sa mga dapit sa tunga-tungang Kabisay-an.

Sa 24,670 ka mga natakdan sa coronavirus, 3,128 mga babaye samtang 3,502 ang mga lalaki. Sila anaa sa edad 21 hangtod 30 nga braket.

Ania ang lain pang braket sa edad nga ang anaa niini natakdan. Sa mga nag edad og 31 hangtod 40 adunay 2,069 nga mga babaye ug 2,911 niini mga lalaki.

Sa mga nag-edad og 41 hangtod 50 moabot sa 1,551 ka mga babaye ang natakdan sa coronavirus samtang 2,054 ang mga lalaki.

Sa mga nag edad og 51 hangtod 60 miabot og 1,431 ang mga babaye nga natakdan samtang 1,645 ang mga lalaki. Sa mga nag edad 61 hangtod 70 miabot sa 940 ang natakdan nga mga babaye ug 979 ang mga lalaki.

Sa mga anaa sa braket nga edad 71 hangtod 80 ang mga babaye 447 samtang 508 ang mga lalaki. Sa mga nag edad og 81 pataas miabot og 174 ang mga babaye samtang 158 ang mga lalaki. Ang mga nag edad og ubos sa usa ka tuig, 82 ang mga babaye ug ang mga lalaki 104.

Ang mga nag edad og 21 hangtod 30 nga maoy nag una sa pagpanakod sa coronavirus anaa kini sa Cebu City, Cebu Province, Lapu-lapu City ug Mandaue City.

Karon nga nasayran na ang datus kinsa ang kusog nga manakod sa coronavirus, unsa man ang tubag niini sa mga ahensiya sa gobyerno aron mapakgang ang mga young adult sa pagpanakod?

Ang datus dako og ikatabang sa paghimo og lakang aron mahimong epektibo ang pagsulbad sa COVID-19.

* * *

Malipayong Pasko kaninyong tanan.