Bakit blood-thirsty ang ilang mga pulis?
Malakas ang loob ng ilang pulis kaya walang habas kung sila ay pumatay ng tao. Kahit batid nilang sila ay kinukunan ng video, parang ipinagmamayabang nila na kaya nilang bawian ng buhay ang sino mang kursunada nila. Para bang sinasabi “hoy, pulis kami. May lisensya kaming pumatay ng kahit sino”.
Bakit kaya? Akala nila ay palagi silang kakampihan ni Presidente Duterte na madalas magsabi na kung makapatay sila sa pagtupad sa tungkulin, “susuportahan ko kayo.”
Kahit hindi sabihin iyan ng Pangulo ay tama naman. Kaya may sandata ang mga alagad ng batas ay para idepensa ang sarili o kahit ibang tao na nanganganib ang buhay sa kamay ng mga kriminal. Hindi ginagamit ang sandata sa pagpatay sa mga taong inosente at walang laban.
Pero ang pagkakasabi ni Duterte ay tila baga justified ang pagpatay na gagawin ng pulis kahit ano ang dahilan kaya ‘yung ibang maigsi ang pang-unawa ay nahihikaya’t pumatay kahit ng mga walang kalaban-laban.
Nagulantang ako at ang marami sa nag-viral na video ng isang pulis na walang habag na binaril sa ulo ang isang mag-ina na parang pumatay lang ng aso. Ang pulis ay si M/sergeant Jonel Nuezca ng Parañaque police, na pumaslang sa mag-inang sina Sonia Gregorio, 52 at anak na si Anthony sa Paniqui, Tarlac.
Galit na galit daw ang Pangulo sa pangyayari at nangakong mabibigyan ng hustisya ang mag-ina. Maraming pulitiko rin ang sumakay sa issue at kinondena ang pangyayari. Hirap sa gobyerno, masyadong reactionary. Kapag nangyari ang aberya ay doon pa lang umaaksyon pero walang ipinatutupad na pangmatagalang solusyon!
Itong killer-cop na ito ay patung-patong na pala ang mga asunto pero nananatili pa sa serbisyo. Ngunit bakit kinailangan pa ang isang monumental crime bago siya ikalaboso? Kung walang nag-viral na video ng pamamaslang mapapansin kaya ng gobyerno ang buktot na ginawa ng killer-cop para gawan ng aksyon?
- Latest