Protector sa kinabuhi nga kriminal

Kinsay dili matukbil ang kasingkasing sa gidangatan sa inahan ug anak nga gipusil patay sa silingan nila nga usa ka pulis gumikan lang sa panaglalis nga misangpot sa brutal nga krimen.

Nakuhaan og video ang panghitabo nga sama sa pelikula nga nahimong blockbuster sa social media.

Dili ko makaako og tan-aw sa video dili lang tungod sa ka brutal sa panghitabo kondili tungod sa kaluoy nga gibati ngadto sa usa ka inahan kinsa mibuhis sa iyang kinabuhi aron kapanalipdan unta ang iyang anak.

Apan nag-unong sila sa kamatayon kay siya man ang giuna sa pagpusil sa suspek dayon gisunod ang 25 anyos nga anak.

Wala silay armas nga hulga sa kinabuhi sa pulis apan tungod sa yawan-ong hunahuna ug pagbati nga iyang gipasulabi niadtong higayona.

Makita nato ang gugma sa inahan nga dili masukod kinsa wala niya baliha ang kamatayon tungod ug alang sa iyang anak.

Samtang makita usab nato ang habig sa pulis nga nasamotan sa pagtukmod sa iyang anak nga murag demonyo niadtong higayona nga nakaingon sa pagbanaw sa dugo.

Matud ni DILG Secretay Eduardo Año nga isolated case ang nahitabo dungan sa pagpasalig nga mahatagan og hustisya ang mga biktima.

Para nako dili acceptable nga moingon lang og isolated case ang nahitabo kay kinabuhi kini. Usa o daghan nga kinabuhi pareho ra ang gibug-aton busa big deal kini.

Ngano man tungod lang kay ordinaryong tawo ang nalambigit? Kung mga dagkong opisyal o prominente hatagan gyud og espesyal nga attention.

Hinuon natutokan na kini og national attention kay napukaw man ang pagbati sa mga tawo gani mismo si Presidente Duterte nihulagway niini nga brutal ug iyang gibalikas ang pulis nga kriminal.

Samtang ang ubang idalahig pud ang tanang pulis o ang tibuok organisasyon nga dili gyud angay kay wala may labot ang uban sa gihimo sa kauban nila.

Pareha ra gud ni sa uban nga grupo nga dunay badlongon apan dili man idalahig kay wala may labot, tungod lang ba kay naka uniporme idamay nalang, unfair pud.

Kadaghan sa mga pulis nga maayo ug nagtamod sa ilang prinsipyo nga mao ang pagpanalipod sa katawhan. Kung wala pa ni sila, magpasulabi na ang mga kriminal.

Hinuon angayan nga limpyohan sa PNP ang mga bulok nilang mga miyembro sama niining kriminal nga naa naman diay kaso kaniadto apan nakalusot gihapon.

Unta kong nataktak na sa serbisyo wala na sila sila madamay pa sa ka kriminal niining tawhana.