Happy problem gikan sa City Hall

Gikalipay sa senior citizens ang gipakitang love and care ni Cebu City Mayor Edgar C. Labella alang sa mga tigulang, kinsa daghan na’g sakit ug delikado’g dugay ma-expose sa mga tapoktapok ning panahon nga padayon ang pagpanakod sa kagawng COVID-19 sa tibuok kalibotan.

Petsa Disyembre 11 pa lang, gamit ang megaphone, gibandilyo na sa tig-anunsiyo sa among lugar, nga untop alas 7:00 sa buntag sa Disyembre 12, ipanghatag na sa taga City Hall ang naipong P4,000-senior cash assistance didto sa among homeowner’s gym. Imbes, i-house to house paghatod.

Tuod man, pag-abot sa maong adlaw, wala pay 7 a.m., daghan nang seniors ang nanulod sa gym. Ako, 8 a.m. na miadto.

Tulo ka pirasong slice bread ray akong gipamahaw kay nagtuo kong madawat dayon ang P4,000.

Pastilan, pagsulod ko, ingon sa dunay dinagkotang judas belt nga nag-away-siningkahay: ang among tig-anunsiyo batok sa usa ka senior citizen, kinsa nasuko kay ang taga CH, kinsa maoy miabot isip advanced party, listahan sa seniors ray gidala.

Walay kuwarta! Sanglit, ang gitugyanan, atua pa kuno sa CH, mao pay pagkuha.

Naluoy ko sa tig-anunsiyo. Dapat, ang taga-City Hall maoy gikonpronta sa miasoasong senior. Ug dili ang tig-anunsiyo.

Kay dili baya siya ang tinubdan sa maong info. Naluoy sab ko sa senior. Kay simbakog atakihon sa traydor nga sakit, unya may mahitabo, pagkadakong demalas!

Pasado 10 a.m. nang miabot ang nagdala sa kuwarta, si Elsa Gabutan. Gipangutana ko siya nganong ang 7 a.m. nahimo mang past 10 a.m.?

Siya namahayag nga ang City Hall kuno 8 a.m. mangabli.

Dayon, ubay-ubay silang maglinya aron pagkuha sa kuwartang gikinahanglan.

Matud niya, wala ma-release sa in-charge ang kuwartang dapat andamon daan sa bisperas sa dili pa kini ipanghatag ngadto sa seniors.

Gumikan niini, daghang seniors ang na-exposed pagdugay sa pundokpundok, kinsa on-time mituman sa oras nga gisaad, pero gipaantos og dugay sa mga taga CH, kinsa gisugo ni Labella nga i-deliver pagsayo ang iyang love and care para sa seniors niining paskoha.

Apan gipakyas lang sa mga gipadalang sinaligan. Hinuon, pabiling mapasalamaton ang seniors sa limbatianong tumong ni Lablella.

Ug mikonsiderar na lamang ning kapalpakang nabuhat sa iyang ginsakpan nga usa ka ‘happy problem.’