Libre ang vaccine

Kon ma-available n ang vaccine dinhi sa dakbayan, maoy tinguha ni Mayor Ed Labella nga ihatag kini for free. Ni Labella pa: “Mao na'y atong katuyoan. Libre na. Dili na nato pabayran sa atong mga kaigsuonan.” Nindot kon maoy mahitabo, kay sumala sa nag-una nga mga kasayoran, mahal ang maong mga vaccines, ug kadto rang mga tubig-tubigan ang maka-afford.  Kita, magpadaplin lang unya ta?

Ug sumala sa mga huhongihong, gawas sa mga frontliners, ang hatagan sa unang mga pagtagad mao kuno kitang mga senior citizens, ang mga vulnerable.  Dapat na lang. Dugang niini, gikalipay ni Labella ang pagpahibawo nga ang dakbayan sa Sugbo napili nga usa sa mga priority areas kon ma-available na unya ang vaccine.  Kini sumala sa gipahibawo kaniya ni vaccine czar, Secretary Carlito Galvez. Ug nasayran nga mao usab kini ang tinguha ni Presidente Digong Duterte.

Niini makaginhawa na ta’g gamay. At least aduna na kitay makita nga kahayag at the end of the tunnel.  Matud ni Labella, ang dakbayan adunay mga plano pagpamalit sa vaccine, idugang kon pilay ikahatag nganhi kanato sa national government. Tinguha sa mayor nga kabakonahan gayud kitang tanan: “For me, it will be better if everyone will get vaccinated. The city has a plan to purchase the vaccine to augment whatever will be given by the national government.”

Suma pa, ang kagamhanan sa America, mipasalig nga ang Pilipinas maoy usa sa mga nasud dinhi sa region nga maka-avail sa vaccine nga gi-developed sa giingon nga pharmaceutical giant sa America, Pfizer, ug ang BioNTech sa Germany. Gipaabot nga shipment niining maong mga vaccines unya na sa unang mga bulan sunod tuig .

Dugang niini, si Secretary Teodoro Locsin Jr., mibutyag nga ang Pfizer andam na pag-deliver sa vaccine nganhi sa atong nasud, sa Enero, sunod tuig. Midugang si Locsin nga gipasaligan siya nga makakuha siya’g 10 milyones ka doses sa Pfizer nga gi-financed sa World Bank (WB) ug Asian Development Bank (ADB).

Ug gikan ni kanhi Senador Manny Villar, iyang gisugyot nga aron magmalampuson ang distribution unya sa vaccine, gikinahanglan ang government-private sector alliance. Ang panagtambayayong sa gobiyerno ug sa pribadong sector.

Tinuod, gikinahanglan ang pagtinabangay tali sa kagamhanan ug sa private sector kon buot kita nga magmalampuson ang vaccine distribution unya. Dili baya ni sayon kon solohon lamang sa gobiyerno kining maong tahas. Sa iyang sinuwat, si Villar nagkanayon: “Winning  the war against Covid-19 in the Philippines will now hinge on the effective and timely distribution of vaccines across the nation. The government has already started detailing its distribution plan and priorities in the vaccination program, but it will need the help of the private sector as a trusted partner in eliminating the virus.”

Kon tan-awon, sayon kaayo kining maong obligasyon. Pila ra guy pag-distribute. Apan alang kang Villar, complicated baya kini. Dugang niya: “The challenges in dispensing the vaccine, are gargantuan. Vaccine czar Carlito Galvez Jr. this early has seen the formidable obstacles the government will face in getting majority of the population inoculated against the coronavirus” Sumala sa pasiunang estimate ni Galvez, kining COVID-19 vaccination program will molungtad gikan sa tulo ngadto sa lima ka tuig. Iyang gitumbok, isip example, ang pag-manage sa atong nasud sa lima lang ka milyon nga vaccinations matag tuig ubos sa normal nga immunization program.

Unsa na kaha kini karon nga ubos kita sa adnormal nga sitwasyon? Apan, matud ni Villar: “I remain optimistic, however, that the nation can shorten this timeline through a trusted partnership with the private sector.”