EDITORYAL - Seryuso ba gyud makauna sa bakuna?

Nagkamulo na og palit ug nadawat na gani sa mga adunahang mga nasud ang unang batches sa milyones ka doses sa COVID-19 nga dugay na kaayo nilang gipaabot.

Apan sa Pilipinas, daw kaduhaduhaan pa kay wala pay klaro kun bakuna ba ang unahon o ang kaugalingong interes sa pipila.

Ang mga opisyales sa gobiyerno duna nay gihimong negosasyon sa Pfizer sa Europa alang sa pagpalit og 10 milyones doses sa maong bakuna nga matud pa sa report ihatud unta karong bulan sa Enero sa sunod tuig.

Si Foreign Affairs Secretary Teodoro Locsin Jr. sa iyang Tweet kagahapong adlawa mi-post nga pinaagi kang US Secretary of State Mike Pompeo silang duha ni Philippine Ambassador to the US Babe Romuladez gipasaligan nga ipadala ang maong mga bakuna karong Enero.

Apan daw dunay wala mauyoni si Locsin nga iyang gipaagi  sa sumbingay nga “somebody dropped the ball.”  Unsay gipasabot niya, duna kahay mga balhibuo'g mga kamot nga gustong mosawsaw ug ipalangay ang bakuna gikan sa Pfizer?

Sumala pang Locsin, ang 10 milyones doses nga Pfizer vaccine makuha sa Pilipinas pinaagi sa World Bank ug ADB daw si Pompeo maoy usa sa nidupa para sa Pilipinas aron makauna sa bakuna.

Apan dunay mga opisyales nga gustong dauton ang gobiyerno kay kuno hinay og lihok mao nga nauwahi kini sa makapalista sa pagkuha sa bakuna.

Sa gihapon, si Locsin miklaro nga wala gyud mauwahi ang Pilipinas sa mga nagpalista, duna lang gyuy mga tawong wala gyuy intensiyong molihok aron makauna makakuha og bakuna o sa maong bakuna sa gikan sa partikular nga kompanya.

Ang tanghaga mao ni, si Locsin miingon nga gipasaligan na ang Pilipinas nga makaangkon sa maong bakuna gikan sa Pfizer ug ipadala pa gani kini dayon karong Enero sa sunod tuig. Apan si Presidential Spokesman Harry Roque lahi man og pamahayag.

Matud pang Roque usa ang Pfizer sa gitan-aw sa Pilipinas nga palitan og bakuna apan sa ikaduha o ikatulong kwarter pa sa tuig 2021 kini mahatud mao nga gipili sa gobiyerno ang Sinovac gikan sa China.

Pagkadakong salikwaot paminawon, naa na ang Pfizer mopadala na og bakuna apan dili lang una dawaton kay unahon ang Sinovac?