Ang Nativity scene sa Vatican City

Daghan ang nahinangha kay alang nila murag halayo ra gyud kaayo sa tinuod nga kahulogan sa Nativity scene. Alang sa kadaghanan, mura kini og Tuskien Raider, Star Wars ug uban pa.

Ang rason mao nga daghan usab ang wala makauyon sa maong mga imahen ug naglisod sila pagdawat sa maong dagway niini.

Sa laing bahin, didto sa Espanya, nakita nila nga ang mga imahen sa Nativity scenes gipasul-ob og facemasks ug bisan unsa nga nakapahinumdom nato sa COVID-19 pandemic.

Ang tanan nausab na gyud. Napuno hinuon sa daghang mga pagsaway ang maong Nativity scene.

Apan ang pangutana mao nga angayan ba gyud kining ikasuko o nahilasan lang gyud kita sa atong naandan nga pagsabot nga ang Nativity scene kinahanglan nga limpiyo, kalmado ug nahiuyon sa atong giisip nga standard.

Ang maong talan-awon sama sa panchamama nga nakapasuko kanato kay giisip man nato ang maong talan-awon ingong panamastamas sa naandang mando sa arte nga relihiyoso.

Dili ba kaha kini inculturation? Sa tinguha sa simbahan nga mamahimong relevant gihapon sa kasamtangang panahon mao nga napugos na lamang siya pagsunod sa uso aron mamahimong acceptable alang sa kadaghanan ang iyang pagpanudlo apil na niini sa paghimo sa moralidad ingon nga subjective issue sa kadaghanan kanato.

Dili ba malisud man kini buhaton? Ambot lang kun unsaon nato kini pagsumpo?

Kaniadto ang misa taastaas gayud apan karon mahimong ang mga manimbahay maoy magbuot kun unsaon nato pagsaulog ang Santos nga Misa. Ug unsa katas-a ang wali?

Gani tungod sa kadaghan sa mga tawo nga nagpakabana kuno mao nga hasta ang unod sa imong wali ila pang hilabtan?

Malisod kaayo ning mga panahona. Tungod sa pandemiya daghanan nato ang nahimong mga tawo nga puno sa pagpanghilabot hopefully for the better ug dili sa for the worse. Ingon ini na gyud tingali ang kalibutan karon.

Padayong tay-ugon ang sukaranan sa moralidad sa tawo diin sa hinayhinay nga paagi kini natun-as ug pagabanlason sa kawalay kapaingnan.

Ang tanan alang kanila disposable, ang tanan nahimong relative.

Didto sa Buenos Aires, ang dapit diin nagagikan ang atong Santo Papa, daw sa puno sa kalipay ang mga kababayen-an sa dihang gihimo sa gobiyerno ang pagdason nga ang aborsiyon usa na ka dakong legal ug nga kini tugotan aron sa mga kababayen-an mapahimuslan.

Mao nga ning panahona daghan na gyud tingali ang magtagbaw sa tumang kalalim unsaon na lang.