Leonen hinay, gisaway

Gamhanan ang Korte Suprema sa Pilipinas. Ang 15 ka huwes nga gitugyanan pagdala sa atong timbangan sa hustisya, pulos hinashasan sa presidente, kinsa maoy mipili kanila, misalig sa ilang katakos, kakugihan ug kapatas diha sa ilang pagpanghukom.

Si Marvic Mario Victor Leonen, kinsa kanhi usa ka dean ug professor sa College of Law sa University of the Philippines, giibot gikan sa mao niyang puwesto panahon sa administrasiyon ni PNoy Aquino ug gibalhin pagpalingkod isip Associate Judge sa Supreme Court of Justice sa atong nasod.

Sa pagpamunoan ni PNoy, puwerteng gubaa sa hitsura sa Pilipinas.

Mibaha ang gidiling drugas. Gikan sa gamay ngadto sa mga dagkong ahensiya, halos tanan, gisanapan sa grabeng korapsiyon.

Daw bagyong Yolanda, Rolly ug Ulysses si PNoy nga nagbilig halapad kadaut nga mao dayoy misugat ni Pres. Rodrigo Roa Duterte sa unang adlaw pa lang niyang paglingkod sa Malakanyang.

Gusto niyang wad-on ang illegal drugs ug korapsiyon sa madali nga panahon. Apan pakyas siya. Kay nakagamot na man pag-ayo ang mga daotang sagbot sa katilingban nga gibilin ni PNoy.

Sa nataran sa atong Korte Suprema, may Leonen sab nga gibilin si PNoy.

Daghag kasong husayonon nga gikuptan. Apan matud pa sa kasaligang tinubdan, aduna siyay 82 ka napundong kasong husayonon sukad sa iyang paglingkod nga daw gipadaplin lang.

Hasta ang 2016 election poll result protest batok ni Bise Presidente Leni Robredo nga dugay nang gipayil ni kanhi Senador Bongbong Marcos gipakatulog lang ni Leonen. Hapit na lang mapupos ang termino ni Leni, wala gihapon kini asikasoha.

Daghang magbabalaod ang gisakitan-nakasaway sa gihimo ni Leonen. Gani, si Secretary General Edwin Cordevilla sa Filipino League of Advocates for Good Government, ubos sa tabang ni Atty. Larry Gadon, mipayil og impeachment didto sa Kongreso batok ni Leonen.

Kabahin sa mga hinungdan, mao ang pagka-negligent ug pagka-incomptent kuno ni Leonen sa iyang trabaho.

 Daghan kinig kasong husayonon, diin dapat mahatagag pinaleng desisyon sulod sa 24 ka bulan gikan sa pagkadawat niini, pero bisg mandatory, gipasagdan lang.

Buling siya nga makahatag og kahugaw sa kalinis sa atong Korte Suprema.

Maayo, kay adunay Sec. Cordevilla nga mipayil og impeachment aron si Leonen matangtang. Unta, justice be served!