EDITORYAL - Libreng sakay sa bus sa QC
Mahirap sumakay sa mga pampublikong sasakyan ngayon. Bukod sa kakaunti ang mga bumibiyahe, iilan lang ang naisasakay (lalo ang bus) dahil sumusunod sa health protocol na dapat ay isang metro ang pagitan ng mga pasahero. Marami rin sa mga dyipni ang hindi pa rin pinapayagang makabiyahe. Pawang maiikling ruta lang ang binuksan.
Kalbaryo para sa mga pasahero ang kakulangan ng masasakyan. Maski agahan nila ang gising para hindi maatrasado sa trabaho, wala ring saysay sapagkat walang masakyan. Halos mamuti na ang kanilang mga mata sa paghihintay ng masasakyan pero bigo pa rin sila.
Ang problemang ito ang sinulusyonan ni Quezon City Mayor Joy Belmonte. Noong Lunes, 85 bus ang bumiyahe sa ilalim ng bus augmentation program. Walong ruta ang binuksan na malaki ang maitutulong sa commuters para hindi na sila mahirapang sumakay. Ang kapuri-puri pa sa programang ito ng Quezon City, libre ang sakay. Walang pamasahe. Convenient ang pagbibiyahe sapagkat malamig.
Ang mga ruta na nasa ilalim ng bus augmentation program ay Quezon City Hall patungong Cubao, Litex/IBP Road, General Luis St., Mindanao Avenue/Quirino, Gilmore, C5/Ortigas Avenue Extension at Muñoz, Welcome Rotonda at Aurora Blvd.
Sabi ni Mayor Belmonte, pinag-aralan nilang mabuti ang mga rutang tatahakin ng mga bus pati mga pick-up points para masigurong hindi mahihirapan ang commuters. Umaasa siya na ang programa ay makakatulong na maibsan ang kakulangan ng public transportation at para na rin mapabilis at maging ligtas ang commuters patungo sa kanilang destinasyon.
Kapuri-puri ang hakbang na ito ng QC government. Malaking tulong ito sa commuters na halos araw-araw ay namumroblema kung paano makakasakay para makarating sa kani-kanilang trabaho. Malaking kaginhawahan ang libreng sakay lalo na sa mga manggagawang kakarampot ang kita na naapektuhan pa ng pandemya. Magandang halimbawa ang ginawa ng QC government at sana maisip din ito ng iba pang LGU para mapagaan ang pagtungo sa trabaho ng mga mangagawa lalo na ngayong nananalasa sa bansa ang pandemya.
- Latest