Ang hilak ni Bebe

Dili pa lang dugay, nisaka ang akong dugo. Kining edaran na ta bisan kwarenta pa lamang ako, duna nay gihambing mga balatian sa lawas.

Usa ka gabii niana, nisaka ang presyon sa akong dugo nga tungod niini ako nidigwa ug nisuka.

Maayo na lamang kay dunay mga tawo nga nagpakabana mao nga ako nahatagan dayon ko og igong pagatagad.

Pagkasunod adlaw, si Nang Bebe ang among tiglimpyo dinhi, ang niatubang kanako ug nibakho kay lagi naluoy siya kanako.

Ako siyang giingnan nga ayaw una og bakho kay wala pa ko magpinal! Ug dihadiha nihunong pagtulo ang mga lugas sa mga luha.

Gipaagi ko na lamang sa joke kun pasiaw ang maong hitabo kay unsaon man pud nato nga dili man gyud kalikayan ang maong kahadlok.

Kahadlok nga sa sayong pangedaron sa yuta unya maluyong.

Dunay panultihon nga nagkanayon: “Do not waste your tears to those people who don’t know how to value them!” apan wala kini magpasabot nga wala koy pagtagad sa maong pagpakabana.

Akong Nakita nga matinud-anon ang iyang paghilak. Timaan kin inga dili komplikado ang iyang kaugalingon bisan pa man kun tingali nahimong komplikado ang iyang kinabuhi.

Kay ang tinud-anay nga nagpakabana sa iyang emosyon mo-invest ngadto sa tawo nga iyang gihatagan og igong pagtagad.

At least por lo menos nahimo akong mahinungdanon alang sa maong sweeper bisan sa daklit.

Dili tungod kay ako maghatagan sa senemana nga nga allowance kondili tingali may nahimo akong nakapadasig kaniya diha sa pagpakabuhi. Mahimong ang tanan pahiyoman apan dili tanan mahimong hilakan.

Sa laing bahin, ingon ini usab ang gipakitang paghigugma sa Dios alang kanato.

Gani ang atong Ginoong Jesus sa dihang siya gi-reject sa iyang kaugalingong katawhan ang mihilak ug nanghupaw.

Unsaon na lamang kaha kun kita mismo bisan sa atong kasayuran nga ang atong Ginoo niula sa iyang dugo apan padayon gihapon nato siyang gilansang gumikan sa atong mga kalapasan dili ba usa man usab kini ka dakong rejection?

Hapit na ang Pasko sa pagkatawo sa atong Ginoo mas makatarunganon nga atong ihalad ang usa ka mahinulsolong kasingkasing ug mapaubsanong espiritu.

Kay mas mahinungdanon pa kini kaysa mga haad sinunog. Amping ug ampo. Amping gikan sa sala, ampo nga sa kanunay magrasyahan kita.