EDITORYAL - Normal nalang ang “new normal’

Baniog kaayo ang pulong “new normal” nunot aning paghugpa sa pandemiya sa coronavirus dinhi sa nasud. Apan sa pagkakaron, dili pa matawag nga new normal kining gihimo sa mga tawo.

Kini tungod kay dili pa gyud tanan ang nagtuman o niseryuso sa pagsunod sa minimum health protocols, duna pa gihapoy mga tawong dili magsuot og facemask, magsige og tapok-tapok ug magsuroy-suroy bisan dili kaayo importante ang gilakaw.

Kaning mga nagsunod sa minimum health protocols nag-praktis palang sab ni, nag-anad sa kaugalingon aron mahimo ng parte sa ilang inadlaw-adlaw nga ginbuhaton ang pagsuot og facemask, paglikay sa mga tapok-tapok, paghugas kanunay o pag-disinfect sa mga kamot matag karon ug unya ug uban pa.

Sa kasinatian karon mahasol gyud ang mga tawo kun sa ilang lugar dunay mangabot nga contact tracers, apan sa wala pa kini mahitabo daghan ang wala magsuot og facemask, nagsige og tapok ug uban pang kalapasan.

Tingali kinaiya gyud maoy angay usbon tungod duna gyuy mga tawong wala magpakabana.

Maganad-anad pa gyud og maayo hangtud nga normal nalang unya ang “new normal.”

Ang National Economic Development Authority (NEDA) miingon nga posibleng magpabilin ang quarantine status sa nasud sa tibuok 2021.

Kani nga pangagpas mahimong matinuod kung dili gihapon mosunod ang mga tawo sa minimum health protocols. Kun ang uban padayong magmagahi kay nagsalig na sila baskog.

Apan kun gusto gyud sa tanan nga mawagtang kining quarantine restrictions, kinahanglang mokubos og maayo ang gidaghanon sa mga madugang nga mga kaso, ug mabuhat lang kini kun mosunod ang mga tawo sa protocols.

Dako sab og papel ang mga local government units niini sanglit sila maoy magbalantay nga motuman ang mga tawo sa protocols, sila sab maoy nag-monitor kanunay sa gidaghanon sa mga natakboyan, contact tracing, pag-andam og quarantine facilities ug ang kanunay nga pagpahigayon og COVID tests.

Dili sab maayong isipon sa mga tawo nga kun duna nay bakuna batok niini mahimo na silang mokumpiyansa. Mas maayong mag-amping lang gyud gihapon sa tanang oras para sa kaugalingon ug sa pamilya.