Pamugos sa sayop nga mga lagda
Giisip sa China nga usa sa labing epektibo nga bahin sa ilang kampanya sa pagbadlong sa COVID-19, gawas sa mas nabaniog nga higpit ug tag-as nga lockdowns, lapad nga swab testing ug agresibo nga contact tracing, mao ang ilang pagpakatap sa drones nga may loudspeakers.
Kaliboan ka drones ang ilang gipalupad sa kinapusoran sa kinadak-an nga mga dakbayan ug sa kinasuokan sa kabukiran sa Mongolia nga nagsibya og lanog nga mga mensahe sa pagbadlong sa mga wa magsul-ob og facemasks ug pagpahinumdom sa mga molupyo sa pagsige og panghunaw.
* * *
May pipila ka local government units ug mga presinto sa kapolisan dinhi sa ato nga nipalupad sab og drones pag-abag sa mga paningkamot pagbaraw sa paspas ug lapad nga tinakdanay sa COVID-19. Apan wa koy nahibaw-an nga nagtaod og loudspeakers.
Kasagaran sa drones igo lang nanguha og hulagway ug video sa mga tigbakay ug ubang tapuktapok nga maoy gigamit sa pagpangita ug pagdakop ug pagkiha sa mga gipasanginlan nga nakalapas sa mga lagda. Ambot nganong way nakahunahuna sa mas laktod ug mas epektibo unta nga paagi sa pagbadlong ug pagpahinumdom.
* * *
May mga mayor nga nipalupad og drones pagsabwag og kemikal sa disinfection sa kabalayan. Wa mopatuo dihang gibadlong sa Department of Health nga nakahulga sila sa kahimsog sa publiko. Hangtod nga may doktor sa kapolisan nga namatay human nakasingo og disinfectant.
Ang disinfection nga gipatuman sa lokal nga mga opisyal sa unang mga adlaw sa pagsulbong sa COVID-19 way kalainan sa ilang fogging operations sa dengue: Bahala nga way kapuslanan basta makapakita sa publiko nga duna silay gihimo.
* * *
Nakatampo sa kapakyas pagbadlong sa COVID-19 sa Pilipinas mao ang pagsukwahi sa mga tagduma sa malampuson nga kasinatian sa ubang kanasuran:
Samtang nag-mass testing ang ubang kanasuran, gipaundayonan nila ang pagpabaha ug pagpaginansiya sa way kapuslanan nga rapid test kits;
Samtang paspas nga nasubay ug nabuwag ang close contacts sa positibong mga kaso sa ubang kanasuran, gigamit ang contact tracing dinhi sa ato aron pagpakauwaw; ug
Samtang gipasikad sa siyensiya ang mga lagda sa ubang kanasuran, ang atong mga opisyal nagpatuyang pagpahamtang sa nagsukwahi nga mga lagda pinasikad sa bisan unsay masud sa ilang bakukang.
- Latest
