Bisan pa man kun kini mahal

Dili pa lang dugay gihimo ang soft opening sa mga nagkadaiyang mga kiosko ingon man Pasalubong Center sa lungsod sa Alegria. Tumong sa maong mga patigayon mao man ang pagpasundayag sa mga produkto nga gikan gyud mismo sa Alegria.

Nagkadaiya ang nihatag sa mga pakigpulong ug usa kanila mao man si Bise Mayor Doc Maggie Magallon. Iyang gipaambit ang iyang kasinatian sa dihang niadto siya sa Australia diin iyang paryente nipalit og kalabasa ug mga utanon. Sa iyang tan-aw, medyo mahal ang presyo niini mao nga iyang giingnan ang iyang paryente nga mahal ra kini. Apan giingnan siya niini nga okay lang kun mahal kini kun paliton ang mahinungdanon makatabang siya sa mga panginahanglanon mao nga makatabang siya sa mga mag-uuma pinaagi sa pagpalit sa mga produkto nga gikan nila.

Kay alang kaniya ang mga mag-uuma mahinungdanong bahin man sa ilang kinabuhi ingon nga nasud. Hinuon dinhi sa ato, daghan man pud ang nagpangga sa atong mga mag uuma mao bitaw nga dunay usa ka politico nga buot i-convert ang mga uma ingon nga mga subdivisions, dungang pa, wala man silay igong katakus ingon nga tawo kay lagi kutob ra man sila sa pagpanguma mao nga ang maong politico nipasar pud og balaodnon nga kun mahimo dili palabian ang mga unli rice sa mga kan-anan nga nagdalit niini aron sa ingon malikayan ang diabetes miletus. Unsa ba?

Mahal kaayo ang magmahal matud pa ning mga panahona karon. Kini tungod kay karong mga higayona daghang mga tawo ang dili maantigo nga mamahimong magmatinud-anon sa ilang kaugalingon. Daghan sa mga tawo karon ang nahimong bakakon bisan gani mismo sa ilang kaugalingong baruganan. Buot silang mamakak kay alang nila safe kini nga buhat basin og mahimong masakpan ang ilang kaugalingong mga kahuyangan.

Mao nga ang pagmahal mahal gyud labina kun maghisgot na kita sa mga risgo nga nalambigit niini. Apil sa risgo mao man nga dili ka higugmaon agig bugti sa imong paghigugma. Ingon ana gyud ang kinabuhi ingon tang pulonga. Usahay mayubiton lang gyud ang tanan.

Balik sa soft opening. Akong nakita nga panahon sa COVID-19 ang matag tawo nahimong mamugnaon dili tungod kay gusto lang gyud kondili tungod kay buot siyang mabuhi.

Ang pagmugna og mga produkto aron mabaligya makatabang man sa financial stability ni bisan kinsa. Dugang pa gikinahanglan pud nga palihokon ang utok ug imahinasyon aron dili mamahimong boring ning panahon sa pandemiya nga maoy  moresulta sa depresyon ug pinakabati mao man ang pagpakamatay.

Nibalik dayon ko sa parokya ug sa akong pagbalik didto nakita ko ang hinayhinay nga transformation niini. At least wala ko mawad-i sa kahigayonan nga mag-imagine. Padayon gihapon aron kinabuhi ko magmabungahon.