Misa de Gallo
Kapin sa duha ka semana gikan karon magsugod na ang Misa de Gallo, timaan nga nagsing-abot na ang pasko.
Apan tungod sa hulga sa coronavirus disease (COVID-19) nagpadayon pa ang lalis angayan bang tugotan o dili ang Misa de Gallo.
Kun ang hepe sa kapolisan dinhi sa dakbayan sa Sugbo ang pangutan-on, mas maayong way Misa de Gallo.
Matud ni Col. Josefino Ligan nga dugang trabaho sa kapolisan ang pagbantay nga masunod ang health protocols sa mga manimba.
Gawas niini siguradong makalapas sa curfew ang mga mosimba.
Busa matud niya mas maayong way Misa de Gallo samtang ania pa ang hulga sa COVID-19.
Ang ubang opisyal sa kapolisan hinuon uyon nga may Misa de Gallo basta siguroon nga masunod ang tanang health protocols.
Si Mayor Edgardo Labella way klarong baruganan tungod kay mag-agad siya sa inter-agency task force.
Apan si Vice Mayor Mike Rama buot nga may Misa de Gallo tungod kay dugay nang gihikawan ang katawhan sa mga relihiyosong kalihokan.
Sumala pa ni Rama nga wala tugoti ang katawhan pagtimaan sa semana santa ug ingon man sa kalag-kalag.
Nagkanayon si Rama nga panahon na nga itugot nga makahimo sa tradisyon ang publiko.
Wala gyud kinahanglana nga putlon ang tradisyon sa Misa de Gallo. Angayan lang siguroon sa kadagkoan sa simbahan nga istriktong mapatuman ang social distancing sulod sa simbahan.
Kun imposible gyud nga mapatuman ang mga lagda, mahimong mogamit ang simbahan sa teknolohiya aron mapadayon ang tradisyon sa Misa de Gallo nga wala kinahanglana ang linawas nga pag-adto sa simbahan.
Pinaagi sa internet mahimong mapadangat ang misa ngadto sa matagpanimalay ug makasimba gihapin ang katawhan.
Kana kun gustohon gyud sa kaparian ang pagtuman sa ilang kristohanong responsibilidad.
Ang pangutana pila lang kaha sa atong kaparian ang mosugot niining maong matang sa pagsimba?
Labi pa nga wa silay mahimong kita niining maong paagi. Dili man mahimong sugoon ang sibot ngadto sa mga pinuy-anan sa mga misimba.
Bueno, tingali ipaagi nalang pud sa GCash ang mga halad aron di sad alkansi ang pari.
- Latest
