EDITORYAL - Safety sa trabahoan

Human migawas dinhi sa Banat News ang kabahin sa mga peligrosong mga gipangbangagang bahin sa mga dalan dinhi sa Metro Cebu, pipila niini ang gitrabaho na gyud sa kataposan sa mga kontraktor u gang uban gipamutangan na og ilhanan aron makabantay ang mga motorista.

Usa niini ang gihimong kanal tabok sa dalan MJ Cuenco Avenue taliwala sa Barangay Carreta ug Barangay Hipodromo. Ang mao proyekto pila sab ka buwang napasagdan, gani gipamutangan lang kini og metal plate ug ambient light human nigawas ang editorial sa Banat News bahin niini.

Nahimong peligro sa kinabuhi sa mga motorista ang kining proyekto sa kadalanan kun way mga barikada, way metal plates sa libaong, way warning signs, way flashing strobe lights panahon sa gabii ug uban pang safety precautions.

Pipila ka motorista na ang nadisgrasya sa maong dapit ilabi na sa dihang nagsige ang bunok ang uwan tungod kay di makita ang libaong tungod sa napundong tubig. Hinuon, karon hapit nga mahuman ug dili na kaayo tanto peligroso agian.

Ug kun dili man dayon mahuman mosunod unta ang mga kontraktor sa mga safety precautionary measures aron way maaksidente.

Dili lang motorista ang nangadisgrasya aning mga excavation ug construction projects kondili hasta pa ang mismong mga trabahante tungod sa pagpabaya sa management ug sa ilang safety teams.

Lisod nang mabawi kun kinabuhi ang makalas tungod sa pagpabaya sa mga kontraktor nga wala mosunod sa Occupational Safety and Health standards nga gimando nga ipasunod para sa tanang mga konstruksyon dinhi sa nasud. Tungod dili lang kini para sa mga trabahante sa site ang safety measures nga gilatag kondili para sab kini sa mga tawong lumalabay sa ilang site.

Mao nga dako kaayong kapalpakan sa mga tagdumala sa mga kontraktor kun dunay madisgrasya sa ilang trabahoan, trabahante man o dili.

Una sa tanan, ang safety sa mga trabaho sa management, tungod kay sila maoy nagkupot sa kwarta para ipamalit og mga safety devices ug safety gears para sa mga sakop ug komunidad palibot sa ilang construction site.