EDITORYAL - Pagbalik sa mga TPUJs

Magsugod na balik og pamasahero sa mosunod nga mga adlaw ang tradisyonal nga public utility jeepneys nunot sa kakuwangon gyud sa masakyan sa mga tawo karong hinay-hinay ng nangabli ang daghang mga negosyo sa Cebu City.

Apan daw dili kampante ang mga tinugyanan sa Department of Health Central Visayas kay dako kaayo ang tsansang mosaka gyud ang mga kaso sa Covid-19.

Sa pagkakaron, ang siyudad nagsalig pa sa mga gipadagang mga buses ug modernized jeepneys nga gihatagan og special permits.

Apan nakita nga samtang nagkaanam kadaghan ang nangabli og balik nga mga balay patigayon, nagkakuwang gyud ang masakyan sa mga tawo.

Tungod kay wala pa man gyud mahingpit ang transport modernization sa gobiyerno ug nibuto kining pandemiya, way laing mahimo kondili ang pagpabalik lang una sa operasyon sa mga tradisyonal nga PUJs.

Apan lehitimo ang kabalaka sa mga taga DOH , posibleng makompromiso ang social distancing kun dili mosunod ang mga drayber u gang mga pasahero sa physical distancing ug pagsunod sa tanang health protocols.

Apan dili lamang diha sa TPUJs magkatinakdanay kondili tungod kay kung daghan ng masakyan ang publiko ug makalakaw na sila ngadto sa mga lugar nga gusto nilang adtuon ug mapasa-pasa ang virus.

Mao nga mas maayong buhaton mao mismo ang mga tawo mag-amping sa tanang oras matag mogawas sila sa ilang panimalay kung dunay mga importanteng lakaw.

Simple ra gyud kaayo ang personal nga pag-amping. Magsuot kanunay og facemask, mag face shield, molikay sa tapoktapok sa mga tawo ug batasanon ang paghugas kanunay sa mga kamot.

Kana palang daan, makalikay na ang tawo nga matakboyan sa Covid-19, apan nganong ang uban morisgo gyud sa pagahi-gahi pagtuman niini.

Subo lang nga sila pa usab maoy kusog kaayong moyawit nga di tinuod ang maong sakit ug gobiyerno ra og mga doktor ang nangwarta, apan diay to, wala gani silay mga permanenteng trabaho.

Dili unta tungod sa pagbalik sa TPUJs mosaka og maayo ang mga kaso tungod kay ang tanan man gihapoy magbago sa kalisod.