Mangiwit na sab ta sa bakuna
Dunay tulo ka paagi nga mapilian sa Pilipinas ug ubang kanasuran aron pagtino nga makabahin sa pasiuna nga suplay sa mga bakuna nga mapamatud-an nga luwas ug epektibo batok sa COVID-19:
Una, ang pagkontrata daan sa mga kompaniya sa tambal bisan wa pay seguro kon kapuslan ba ang ilang kandidatong mga bakuna;
Ikaduha, ang pakiglambigit sa mga kompaniya sa tambal kansang mga pabrika sa bakuna nahimutang sa ilang mga nasud; ug
Ikatulo, paghimo sa suplay sa bakuna nga bugti sa pagtugot sa clinical trials nga ipahigayon sa ilang mga teritoryo.
* * *
Si Presidente Rodrigo Duterte nigahin lang og P2.5 bilyones sa pagpamalit og bakuna, nga kuwang nang daan apan magamit unya pa sa sunod tuig kanus-a gikabalak-an nga mahurot na og kahalin ang pasiunang suplay sa mga bakuna.
Wa sab magtagad ang iyang pamunoan sa pagsusi ug pakigsabot daan sa mga tighimo sa mga bakuna nga dunay mga planta sa Pilipinas. Ug gipasagdan nga matanggong sud na sa pila ka buwan ang aplikasyon sa mga kompaniya sa tambal paghimo og clinical trials sa ilang mga bakuna dinhi sa ato.
* * *
Ang gihimo sa presidente, nga di makatubag sa atong dinaliang panginahanglan sa mga bakuna, mao ang pagsige og pasalig nga kitay unang makakuha sa mga bakuna:
Nipasalig siya nga una tang makapahimus sa bakuna sa China apan naunhan sa Indonesia nga nibayad na alang sa 290 milyones ka doses sa mga bakuna sa CanSino, Sinovac ug Sinopharm; ug
Nipasalig siya nga una tang makakuha sa bakuna sa Russia nga mao pa diay pagsugod sa Phase 3 clinical trials.
* * *
Giawhag ang mga pangulo sa kanasuran sa pagsabot nga samtang ilang tahas ang pagbakuna sa ilang katawhan batok sa COVID-19 mahimo lang luwas ang mga molupyo sa ilang nasud kon mahimong luwas ang kinabag-an sa mga molupyo sa tanang kanasuran.
Kay apil man ang mga Pilipinhon sa mga maglaway lang sa pasiunang suplay sa mga bakuna sayo sunod tuig, angayng maamgohan nilang Presidente Duterte ug kaubanan nga ang pag-angkon og dinaliang suplay sa mga bakuna, sama sa kampanya pagbadlong sa paspas ug lapad nga pagsulbong sa mga kaso sa Covid-19, di matuman pinaagi sa pagarpar lang.
* * *
- Latest
