Ramirez pinasalamatan ang suporta ng mga Senador
Para sa 2021 budget
MANILA, Philippines — Sa idinaos na Senate plenary budget hearing kamakalawa para sa 2021 budget ng Philippine Sports Commission (PSC) ay hindi naitago ni chairman William ‘Butch’ Ramirez ang kanyang kagalakan sa suporta ng mga Senador.
“We are deeply touched by our Senators’ support,” ani Ramirez. “We thanked them for recognizing the important role sports play in nation building, as well as recognizing the dedication and sacrifice of our athletes.”
Gusto ng mga Senador na dagdagan ang pondo ng PSC para sa paglahok ng Team Philippines sa limang major international competitions sa susunod na taon kung kailan inaasahang mayroon nang bakuna para sa coronavirus disease (COVID-19).
Nakatakdang sumabak ang mga national athletes sa 32nd Olympic Games, 31st Southeast Asian Games, Asian Beach Games, Asian Indoor Martial Arts Games at Paralympics.
Inisponsoran ni Sen. Sonny Angara, nakapasa ang 2021 budget ng PSC sa plenary deliberations ng Senado.
Sa liderato ni Ramirez ay hinirang ang Team Philippines bilang overall champion ng 2019 SEA Games noong Disyembre.
Muling isasalang ang 2021 PSC budget sa bicameral conference committee para sa ipapasang unified bill na daraan sa pag-aaral bago aprubahan ni Pangulong Rodrigo Duterte.
- Latest
