Pagpakabana gisukliag kasabas

Usa ka concerned homeowner nabalaka kaayo pagkakita nga ang gamay ug dulhogon-subidaong karsada gihimo na hinuong bicycle playground sa mga bata. Iya dayong giteleponohan ang guard-on-duty ug gipangutana kon gitugot na ba diay kini sa ilang subdibisyon?

Giklaro sa concerned homeowner nga wala siya masuko sa mga bata. Kondili, nahingawa siya sa dakong kakuyaw nga giatubang niining mga inosente. Kay simbakog masaghiran o mahasmagan, pagkadako sa problema! Dili lang ilang ginikanan ang mapurihisyo. Hasta homeowner nga nakadasmag o maoy gidasmagan sa naglikolikong dagan sa biseklita, mahasol usab!

Mongislit man gani ang hitsura sa tag-iya inig kakita nga nalumping-guba ang hood sa iyang kotse. Unsa kaha kon ang lawas sa mga bata maoy maguba? Ang pait, kon hasta nindot relasyon magusbat!

Mura'g nalusno ang guwardiya sa pamahayag sa concerned homeowner. Diay, hasta guwardiyang gitawagan nakasaksi sa pagduladulag biseklita sa mga bata, sugod pa sa nangaging mga adlaw. Pero, ambot, nganong nawad-an kinig kaisog sa pagbadlong? Nga unta, seguridad sa mga homeowners, iyaha mang trabaho.

Misis sa concerned homeowner nasuko. Giyawyawan iyang bana ngano kunong nanghilabot?

“Of course, because I am a homeowner. Wala lang nako higugmaa ang kaugalingon kong kinabuhi, kondili gihigugma pod nako ang kinabuhi sa atong silingan, labi na sa mga bata nga nagkinahanglag parental guidance.” Tin-aw’ng pasabot sa concerned homeowner.

Nagyawyaw hinuog samot ang asawa. “Nganong dili man lang nimo pasagdang magdula ang mga bata sa karsada? Total, minus pa man ang sakyanang nagdagan. Kon madisgrasya, aw suliran kana sa ilang ginikanan. Ayaw panghilabot kay mga anak baya na silag doktor!”

Mihalang ang dughan sa bana sa iyang nadungog. Wala magtuo nga kontrahon sa iyang asawa ang diyosnon niyang pagpakabana alang sa kaayohan sa tanan. 

Unsaon, maoy mipasulabi sa kahiladman sa iyang misis ang kahadlok nga basig mawad-ag silingan. Busa, bahala nag sayop ang gihimo niini, dili na lang korehian.

Kinaiya nga maoy hinungdan nganong mikatap ang daghang daotan sa atong katilingban karon: CPP-NPA-NDF, mga terorista, rebelde, mangingilad, drug lords, private and public corrupt officials ug uban pang matang sa mga nahisalaag nga karnero. Kay inay santaon ang sayop nga nahimo sa atong isig ka ingon, pasagdan man lang nga magpadayon.