Hingalimtanon

Nagsagol ang gibati nga kabalaka ug kahadlok sa mga opisyal sa dakbayan sa Sugbo nunot sa pagsaka pagbalik sa gidaghanon sa mga nagpositibo sa coronavirus disease o COVID-19. Tungod niini, gimando ni Mayor Edgardo Labella ang pagpahugot pagbalik sa mga border control ug ang pagpresentar sa identification o quarantine pass niadtong mga mogawas sa ilang mga panimalay alang sa mga gikinahanglan.

Ang estriktong pagpatuman sa checkpoint sa mga utlanan nakamugna og kahuot sa trapiko hinungdan nga may nangalangay sa ilang mga tuyo ug nagbagulbol. Ilang gisaway si Mayor Edgardo Labella.

Nganong magreklamo man kun masangit o malangay sa padulngan tungod sa trapik nga namugna sa estriktong pagpatuman sa checkpoint sa mga utlanan?

Angayang huna-hunaon sa mga reklamador nga gipanalipdan lang sa liderato sa siyudad ang ilang kaluwasan batok sa mananakod ug makamatay nga virus.

Angayan pod nga hinumduman sa mga reklamador nga dili kabubot-on sa mayor ang pagmugna og trapik aron lang gyod mo langayon sa inyong mga lakaw. Magpasalamat ta sa lokal nga kagamhanan sa dakbayan sa Sugbo nga wala gihigpitan ang kagawasan sa mga tawo.

Para nako ang estriktong pagbantay sa mga utlanan sa dakbayan paingon ngadto sa laing mga lugar sa lalawigan sa Sugbo dili paghigpit sa kagawasan sa mga tawo kun dili usa lamang kini ka matang sa regulasyon o limitasyon. Ang limitasyon sa lihok sa mga anaa nagpuyo sa dakbayan sa Sugbo ug niadtong buot mosulod bunga sa pagkahingalimtanon sa tawo.

Dali ra kaayong nakalimot ang mga tawo sa coronavirus nga nagpahipi lamang sa palibot. Maong dali ra kaayong nakumpromiso ang kaluwasan sa baratong sapatos nga gibaligya sa bagong abli nga tindahan sa Barangay Lahug.

Busa dili na lang magreklamo kun nalimitahan sa gobyerno ang kagawasan sa tawo tungod kay kini tinuyoan.