Mga datus sa gidiling drugas

Ang paggamit sa gidili nga drugas sa Pilipinas ubos ra sa average sa kalibotan sigun sa pagtuon sa United Nations Office on Drugs and Crime (UNODC). Apan bisan pa man niini, si Presidente Rodrigo Roa Duterte nagtuo nga ang nasud mamahimong usa ka narco nga estado.

Duha sa pinakasikat ug gikinahanglan kaayo nga gidili nga drugas sa Pilipinas ang shabu ug marijuana.

Kaniadtong 2012, ang United Nations nagkanayon, ang Pilipinas adunay pinakadaghang tiggamitan og shabu sa East Asia. Taho sa US State Department miingon nga 2.1 porsiyento sa mga Pinoy nga nag-edad og 16 ngadto sa 64 anyos migamit og gidili nga drugas base sa datus sa Philippines Dangerous Drugs Board niadtong tuig 2008.

Sa tuig 2016, ang United Nations Office of Drugs and Crime, mitaho nga 1.1 porsiyento sa mga Pinoy nga edad og 10 hangtud 69 anyos migamit og gidili nga drugas. Sa Metro Manila, kasagaran sa mga barangay apektado sa gidili nga drugas.

Siyam ka Chinese drug cartels ang nalambigit sa patigayon sa gidili nga drugas dinhi sa Pilipinas matud pa sa US State Department.

Si Presidente Rodrigo Duterte, sa iyang interview sa PTV-4 niadtong Hulyo 7, mibulgar sa pangalan sa mga sakop sa Chinese Triad group nga gilangkoban sa giingong mga drug lords nga sila si Wu Tuan alyas Tatay Co, Jameson Ching, Peter Lim alyas Tiger Balm ug Herbert Colangco nga gikatahong ubos sa pagpanalipod sa heneral sa kapolisan nga si Marcelo Garbo Jr.

Gawas sa Chinese Drug cartels, misingit usab sa Pilipinas ang Mexican drug cartel nga gitawag og Sinaloa nga gipangulohan sa drug lord nga si Joaquin “El Chapo” Guzman.

Ang presensiya sa Mexican drug cartel nahibaw-an human nadakpan sa Lipa City ang tulo ka affiliates sa Sinaloa cartel sa gipahigayon nga pagpangronda sa usa ka buwangan diin sila nakuhaan og 84 ka kilo nga Shabu.

Sa tuig 2010, ang Philippine Drug Enforcement Agency mibana-bana nga moabot sa 6.4 ngadto na sa 8.4 bilyones dolyares ang kitaon matag tuig sa gidili nga drugas dinhi sa Pilipinas.