“Use your coconut”

Matud pa ni Senadora Cynthia Villar, dili angay usikan ang mga biyâ sa lubi sama sa bunot ug ubang bahin niini kay mahimo kining tinubdan sa panginabuhian.  Dugang pa sa senadora, ang tanang bahin sa punoan sa lubi makahatag sa mga batakan’g panginahanglan sa tawo aron mabuhi mao nga tukma ang paghingalan niini nga “Kahoy sa Kinabuhi”.  Angayan nga patalinghugan sa katawhan ug kagamhanan ang sugyot ni Senadora Villar.  Sa ingon mahatagan og gibug-aton ang pagya nga iningles sa akong apohan nga nag-ingon, “Use your coconut”. Olraaayt!

Hasta ‘sing-al’, bawal

Tungod sa ka-popular sa karaoke ug sing-along sa mga Pinoy, mitambag ang DOH sa katawhan nga likayan lang gayod una ang maong matang sa kalingawan, kay diha sa pag-“sing-al”, mas dako ang kahigayonan nga matakdan sa coronavirus. Ni’ng maong kalambuan, nakatu-aw intawon ang akong higala nga ulitawo’ng lagas sa pag-ingon, “Pastilan ni’ng akong kapalaran, kon magpabukid, umaw (ang yuta); kon magpadagat, susot (ang kadagatan), kon mokanta o mangharana, did-an (sa kagamhanan), kon manguyab pud ko, wa’y mosugot. Maypa’g magminyô”.  Hala no!

Nahanaw’ng dokumento

Naobserbahan sa DRRMO sa lungsod sa Rodriguez, Rizal nga kasagaran sa mga tawo nga natanggong sa atop sa ilang kabalayan atol sa pagkusokuso sa Bagyong Ulysses mao kadtong naghiko-hiko kon mobakwit ba sila o dili.  Ang dali nga paghukom sa pagbakwit mahinungdanon alang sa kaluwasan, kinabuhi man o kabatangan ug mahinungdanon’g dokumento.  Apan may usa ka survivor ang mapahiyomon gihapon bisan pa’g nangahanaw ang iyang mga mahinungdanon’g papeles.  Kay lage, gikalipay niya nga lakip sa nahanaw, mao ang iyang “Marriage Contract”.  Pagkatoytoy!

Mohilak bisan hayop

Miawhag ang Philippine Animal Welfare Society (PAWS) sa mga tag-iya’g mga hayopan sa pagbadbad sa higot sa ilang mga binuhi nga hayop kon dili nila kini madala sa pagbakwit atol unya sa emerhensya o katalagman aron sa ingon, mahatagan sila’g kahigayonan nga makalingkawas ug mabuhi. Makaluluoy tan-awon ang mga hayop nga nadisgrasya atol sa bagyong Ulysses nga diha pa sulod sa tangkal o nahigot pa ang liog. Makapahinumdum ang maong talan-awon sa ulohan sa drama sa radio nga nag-ingon,“Hayop ka man, Mohilak ka usab”.  Baya no!

Kinsa’y tagsala?

Human masinati ang halapad nga pagbahâ didto sa Metro Manila tungod sa Bagyong Ulysses, nanggawas usab dayon ang nagkadaiyang opinyon sa hinungdan sa bahâ. Adunay mibasol sa pagbukas sa mga dam; ang COA mibasol sa MMDA sa kalangan pagpatuman sa mga proyekto nga makasumpo sa bahâ; ug gibasol usab sa mga residente ang illegal logging didto sa Quezon Province. Kinaiya sa tawo nga basolon ang uban kon adunay trahedya nga modangat. Kay lage, ginaingon man nga, “Ang pagkamasalaypon, tawhanon, apan labaw’ng tawhanon ang pagpasangil sa uban sa imong kasaypanan”.  Saoonz!