Dugang ngipon sa WHO
Samtang nagpadayon ang pagsubli sa independenteng mga eksperto sa pagduma sa World Health Organization sa pandemya sa COVID-19, nitumaw ang sugyot sa mga nasud nga gipangulohan sa France ug Germany sa paghatag og gahom sa WHO sa pagbadlong sa mga sakop nga di mohatag og tukmang kasayuran ug di mohimo sa tukmang mga lakang batok sa mga hulga sa kalibotanong kahimsog.
Kay atubangan sa daghan uyamot nga mga nasud nga nagpataka, maong wa pa gyod mabadlong ang kagaw hangtod karon, ang WHO igo lang mopasumbingay di ganing kahingan sa mga badlungon.
* * *
Unang gipasanginlan nga namakak sa WHO ug sa kalibotan mao ang China, kansang Dakbayan sa Wuhan maoy gigikanan sa kagaw: Dugay kaayong niangkon ang Beijing sa kaseryoso sa krisis human nagdumili sa pagdawat sa gitanyag nga tabang sa mga eksperto sa Estados Unidos ug ubang kanasuran.
Sunod nga gitumbok nga wa dayon mohatag sa tukmang kasayoran sa ilang mga kaso, apan sama sa China wa sab nganli sa WHO, mao ang Italya ug ubang mga nasud sa kalibotan nga maoy sunod nga nagkabulingit sa lapad ug paspas nga tinakdanay.
* * *
Wa say nahimo ang WHO dihang nagpabadlong sa duha ka higanteng mga nasud sa kampanya batok sa COVID-19:
Ang liderato sa Estados Unidos nagdumili pagsugo sa mga molupyo pagsul-ob og face mask ug sa lokal nga mga opisyal sa pagpahamtang og lockdowns; ug
Ang liderato sa Britanya nagdumili sa pagpahamtang sa physical distancing ug lockdowns kay gipili ang pagkab-ot sa herd immunity isip mas malungtaron nga panagang sa pandemya.
* * *
Gitataw sa kadagkoan sa France ug Germany nga kinahanglang hatagan og dugang gahom ang WHO aron di na masubli ang masulub-ong mga panghitabo nga nakapasamot sa kaguliyang sa pandemya:
Pag-iyahay sa mga nasud sa pagtipig sa ilang personal protective equipment (PPEs), mga tambal ug ubang medical supplies bahala na kon mas nagkinahanglan ang ubang kanasuran; ug
Pagpuhalay sa adunahan nga mga nasud sa pagsipong sa pasiuna nga suplay sa mga bakuna nga dako ang kahigayonan nga maoy una nga maaprobahan nga luwas ug epektibo batok sa Covid-19, busa mahikawan ang mas nagkinahanglan nga health workers ug masakiton nga mga molupyo sa kabos nga kanasuran.
- Latest
