EDITORYAL - Leksiyon

Subo kaayo palandungon nga dunay usa ka balay patigayon nga nag-grand opening apan napasirad- an dayon wa pay lima ka oras gikan sa pag-abli niini.

Wala pa sila makabawi, nag-atubang na sila og imbestigasyon tungod sa kalapasan sa posibleng paglapas sa mga health protocols nunot sa COVID-19 pandemic.

Maayo kaayo ang paspas nga aksyon sa kagamhanan sa siyudad sa Sugbu sa pagpasirado niini tungod kay dako gyud kaayong peligro sa mga tawong nagpunsisok ang sitwasyon.

Samtang dili maayo para sa negosyo, maayo kadto para sa kaluwasan sa tanan, gikan sa mga mamalit ug sa mismong mga trabahante sa maong shoe store.

Dili man tuod kadto mahimong adto ibasol tanan sa tindahan tungod kay ang mga tawo man gyud usab unta otomatikong motan-aw sa iyang kaugalingong kaluwasan.

Apan mas maayo gyud unta kun dunay koordinasyon nga gihimo ngadto sa mga lokal nga otoridad aron mahatagan sila og hustong giya kin unsaon paghimo nga di nila malapas ang mga patakaran karong panahona.

Sayod naman gyud nga kung ingon niining mga dunay promo, sale, ug paukyab sa mga establisamento dagsaon gyud kini sa mga tawo ug kay higpit man ang social distancing tungod sa pandemic.

Bisan unsa pa kadako ang kompanya o establisamento dili nila mapugngan ang mga tawo nga magkuha og hulagway o videos nga gipang post sa social media.

Magsilbi unta kining leksyon sa tanang mga negosyante. Nga sa panahon karon, sensitibo na kaayo ug nagmabinantayon na ang mga tawo tungod aning pandemiya.