Walay Jing Bells karon

Karong panahona unta makadungog na kita og awit sa daygon dili lang sa radyo kon dili gikan gyud sa mga manaygonay nga mag house to house o ba kaha sa mga sakyanan.

Naandan na nato kini sukad pa kaniadto apan karon dili na kini mahitabo tungod sa bag-ong patakaran mugna sa Covid-19 pandemic.

Mipakanaug og kamandoan si Cebu City Mayor Edgardo Labella nga did-an lang una ang pagpangaroling kay delikado pa kaayo sa pagkuyanap sa kagaw.

Wala pa ra bay bakuna o tambal batok sa naasoyng balatian, ang bakuna kasamtangang gilihok pa ug wala pay kasegurohan kanus-a magamit. Makamingaw baya nga dili nato masaksihan o madungog ang mga huni ug awit sa pasko.

Gani ako kong naay kahigayonan ganahan gyud ko manaygon kay murag mobalik ko sa akong pagkabata nga malipay na kaayo kong hatagan og sensiyo kong manaygon, o kulba hinam kong gukoron og iro.

Kutob nalang kita sa paghandum sa atong kasinatian karong panahona unsaon man giusab ang tanan niining pandemya.

Mas maayo pud hinoon nga did-an kini kay dili man maseguro kon ang atong daygonan naa diay positive o ba kaha ang mga nanaygon naay virus busa mas maayong maneguro aron walay mahay.

Sa mga kaigsoonan nato nga ang pagpanaygon ang gihimong panginabuhian ilabi na karon nga lisod ang panahon pasensya na gyud kay nag amping lang gyud ang kagamhanan.

Gawas sa daygon, giawhag usab sa mayor ang tanang establisemento nga dili lang mopahigayon og Christmas party sama sa gipatuman sa city government nga dili sila mag party.

Mas maayo bitaw nga ipadaplin una kining party party karon kay usa man kini ka panagtapok sa mga tawo, basta naay tapok tapok aw naa pud si covid.

Usa ka sipyat lang maamong ang tanan, mahulog sa wala unya ang atong paningkamot nga masumpo ang virus. Karon ra bitaw ni, asa ra man unya na kong molampos kita sa pagpalayas sa virus nga dili layo ang posibilidad kay nahimo na natong ma-flattened ang curve way rason nga dili kita molampos sa atong tinguha basta magkahiusa kitang tanan.

Nausab man ang atong naandan nga gikinananglan kita nga mo adjust tungod sa atong kaluwasan.