Salapi ra kana

Kini ang nabuhiang pulong sa akong higala sa dihang ako siyang gipangutana nga kun nganong sa igong kasayon iyang gihatag ang dakong kantidad ngadto sa usa ka tawo nga nagkinahanglan. Ang maong tawo hinuon kaila niya ug kuyog niya sulod na sa hataas nga panahon.

Iya kining sinweldohan apan niabot lang gyud ang panahon nga nagkalisud kini sa hilabihan mao nga sa kaniya midagan sa pamasin nga iyang matabangan. Kay alang niya mas mahinungdanon ang relasyon kaysa bisan unsang salapi ug kabtangan.

Lisud man tuod ang panahon karon ug daghan kanato ang buot mamahimong mga tawo nga haruhay ug luwas sa bisan unsang mga kabalakang material. Ang rason mao nga dili ta buot nga mamahimong mag-antos sa hilabihan. Ang maong kalisang sa umaabot nga kalisdanan mao man ang nagtukmod sa kadaghanan nga maneguro sa kaugalingon lamang. Ang maong pagpaneguro maoy nakaangin sa uban nga magpabilin nga nakapunting lamang sa kaugalingon ug dili sa uban.

Ang resulta daw lumba ang kinabuhi. Ug ang maong pakiglumba mao man ang nihimo sa tanan nga malawagaw, nahanaw ang panghunahuna nga manginlabot ang nihulip mao man ang pamintaha ingon man panlupig. Kay lagi lisud ang maunhan ug lisud ang maupawan. Mao tingali ni ang hinungdan kun nganong daghang mga tawo ang buot modaut sa ilang isig ka ingon aron sila ang mogawas nga maayo. Sakit apan maoy matuod.

Walay luwas ning maong tendency sanglit daghanan man kanato ang nahimong mga samaran ug biktima usab sa atong tagsatagsa ka mga insecurities. Mao nga mo-assert kita sa atong gahum, bahandi ug kasikat mao nga daghanan kanato ang nahimong nalansang sa maong panghunahuna.

Asa man ang mas mahinungdanon ang salapi nga mahimong biyaan o ang tawo nga magpabiling maghandum kanato ug atong handumon hangtud sa kamatayon? Ideal gyud unta kun ang tawo ang atong hunahunaon. Apan ang buhing matuod nagtudlo nga mas daghan kanato ang nipalabi sa salapi ug bahandi kaysa tawo. Kay pinaagi sa pagsalig sa bahandi daghan ang nagtuo nga sila mas nakalingkawas gikan sa bisan unsang kalisud.

Apan ang buhing matuod mao nga dili mahimong moalagad sa duha. Kay ang mahimong imong dumtan ang usa ug ang usa imong higugmaon. Hinumdomi nga kun unsa gani ang imong gipili mao usab kana ang mosulti kun unsa ka nga matang sa pagkatawo.

Kay ang tawo nga nahimong mapagarbohon sa iyang nakab-ot sa kinabuhi tawo usab nga wala makatugkad nga siya diay mismo mamahimong malukapa gumikan sa habog nga layat nga iyang gihimo.