Dili masimhot ang kaugalingon

Atol sa usa ka pagdungog sa Senado, gibutyag sa kanhi miyembro sa rebeldeng komunista nga si Jeffrey Celiz alias “Ka Eric” nga nakaagni ang CPP og kapin 8,000 ka estudyante nga magpasakop sa “underground movement” gikan sa tuig 2016 ngadto sa 2019. Angayan nga magmabinantayon ang mga ginikanan sa ilang mga anak kay sayon ra ang pagdani sa mga kabaton-an sa ideolohiya sa CPP.  Kay matud pa lage, “Ang ideolohiya sama ra sa kaugalingon ‘mong gininhawa; bisan unsa ka lang-og sa bahô niini, dili mo kini masimhotan”.  Aw, mao ba diay!

Erensya nga utang

Matud pa sa Moody’s, usa ka inila’ng credit rating agency, ang nasud nga dagko’g utang karong tuiga tungod sa pandemic, mahiagom sa negatibong epekto sa pagbayad niini sa umaabot nga tuig.  Nalakip sa maong panglantaw ang Pilipinas.  Ginaingon sa Bibliya nga “Bulahan kadtong mapaubsanon kay maila ang gingharian sa Diyos”.  Apan ni’ng higayona diin naputos ang nasud sa utang, haum ang giingon ni Herbert Hoover nga, “Bulahan ang mga kabatan-onan kay mapanunod nila ang nasudnong utang”.  Fezteleeern!

 Labaw’ng pinangga ang iro

Usa ka lumolupyo sa Camalig, Albay giingon nga wala managana pagbiya sa lugar nga ilang gipasilongan atol sa pagkusokuso sa bagyo’ng Rolly aron lamang pagluwas sa nahibilin niya nga mga iro didto sa ilang panimalay.  Dalaygon ang gibuhat sa maong lalaki. Ginaingon nga masuta ang kabulawanon sa kinaiya sa tawo kon ang mga iro nga iyang giatiman, nagmahal usab kaniya.  Apan nasagmuyo lang ang akong silingan kay lage ang iya kuno’ng asawa kusog mohalok sa ngabil sa ilang iro apan dili moinom sa baso nga iya na’ng nagamit.  Asa ang hustisya!

Limbong sa COVID-19?

Segun sa gipagawas nga datos sa DOH-Central Visayas (DOH-7), ang ‘stroke’ mao ang nag-unang hinungdan sa kamatayon dinhi sa rehiyon niadtong tuig 2019. Gisundan kini sa sakit nga pneumonia, sakit sa kasingkasing, kanser ug hypertension.  Layo ra ang gidaghanon sa mga nangamatay sa COVID-19 kon itandi sa mga sakit nga gihinganlan sa unahan.  Dugay na nga gihandum sa katawhan nga mabalik kita sa atong naandan nga pagkinabuhi.  Senyales na ba kini’ng gipadayag sa DOH nga angayan na kita mobiya sa pagkinabuhi ubos sa limbong sa COVID-19?  Hinaut pa unta!

Danay mahanaw

Buot ni Cagayan Governor Manuel Mamba nga idili ang pagpanaygon atol sa kasaulogan sa Pasko aron mapugngan ang pagkuyanap sa COVID-19.  Dugang pa sa gobernador, gawas nga adunay curfew nga gipatuman, ang pagpanaygon magtandang sa kabataan ngadto sa coronavirus gikan sa mga tawo sa komunidad.  Makalibog ang mga lagda. Sirad-an ang sementeryo atol sa kalag-kalag apan ablihan ang mga buwangan. Did-an ang pagpanaygon apan gi-ablihan ang mga malls ug dagkong tindahan.  Kadakong baligho kon adunay mga tradisyon nga mahikalimtan ug mahanaw na lang tungod sa pandemya. Madahaan!