Pagkapikas sa ostia

Nobiyembre 1, 2020. Daghang misimba sa All Saints’ Day nga misa. Daghan sab ang mga nagpamisa alang sa mga nangamatay, kinsa sagad mahandom lang  pag-abot niining adlawa.

Samtang nagbasa ang lector sa nagtipun-og nga mass intentions, midugok usab ang mga aninong nanagdalag mga sobre ug papel pamisa alang sa mga kalag ug ubang intentions, sa walay paghunahuna nga wala na sa tukmang higayon ang ilang gihimo.

May giplastar nga mga kahon (dropboxes) ang simbahan, diin gipahibalo ang mga parokyano ug manimbahay nga tanang sobreng gisudlag halad alang pamisa sa mga kalag, adto gyod ihulog sa naasoyng dropboxes. Pero, wala tumana.

Kay imbes ihulog ang mga sobre didto sa dropboxes, gipangdala-tunol man hinuon gihapon kini sa mga nagpamisa ngadto sa lector, kinsa nagsugod nag basa sa mga mass intentions nga nahan-ay nang daan sa nangaging adlaw didto sa opisina subay sa hustong patakaran.

Resulta? Mikaon og dakong panahon ang pagbasa. Milapas sa tukmang oras nga dapat sugdan na ang Santos nga Misa.

Ang pari natagbaw intawog paabot. Ug ang mga papel ug sobreng pamisa nga atrasawo na kaayong gitunol, wala gyod mahurot.

Panahon sa pangalawat, nakurat ko. Kay dihang gitunol sa pari ang ostia ibabaw sa akong walang palad nga gisapnay sa tuo, napikas ang ostia.

Nakita ko ang hugot nga pagpiit niini sa pari gamit ang iyang tudlo ug kumagko. Ug dungan sa pagkapikas sa ostia, daw gihiwa sab ang akong kasingkasing sa hilabihang kasakit.

May mensaheng gipadayag ang maong pagpiit sa pari sa ostia hangtod napikas. Tingale, segun sa akong pangagpas, ang iyang pagkatawhanon maoy mipasulabi sa iyang galamhan niadtong tungora.

Pero nganong ang lawas man ni Kristo maoy iyang pahimungtan? Nganong dili man ang tawong hingtungdan?

Tapos sa misa, nakig-istorya namong mga lector ug cantor ang pari.  Matud niya, hinay ra kuno kong mobasa. Usa sa mga hinungdan, nganong wala matiwas pagbasa ang daghan pang nahabilin.

Unya, mao pa gyoy giuna nako ang mga pirasong papel. Ug giulahi ang opisyal nga listahan sa nagpamisa gikan sa opisina.

Humok kong giangkon ang maong kasaypanan uban ang pag-ingon: “Sorry kaayo, Father.” At least, sa hilom, akong natugkad ang nagpahiping mensahe sa pagkapikas sa ostia.