Kahayag sa mga traditional PUJ

Gipahibawo ni Cebu City Mayor Edgardo Labella nga adunay kapin sa usa ka libo ka mga Public Utility Jeepney sa dakbayan ang girekomendar sa Adhoc Committee nga tugotan nga makabalik sa pagpamasahero.

Kini ang pasiuna sa singko mil ka mga PUJ sa syudad nga nahunong tungod sa COVID-19 pandemic kay dili man kuno mamahimong tugotan ang tanan.

Apan kining 1,355 ka mga traditional PUJ ipaubos pa sa makuting evaluation kong haum pa nga mobiyahe sama sa mga lagda nga tumanon, COVID-19 test aron maseguro nga luwas gikan sa virus ug uban pa.

Oktobre 30 hangtod sa Nobiembre 3 ang evaluation process ug kadtong dili makapasar aw dili gyud matugotan, nagpasabot nga mahashasan pa gyud ang gidaghanon.

Ang mga natugotan gibase sa consultation nga gipahigayon mismo sa mga transport group sa kinaraan nga jeep.

Mag-unsa nalang ang 4 mil nga dili matugotan? Ang tubag sa mayor nga irekomendar niya nga mahatagan og trabaho sa uban nga transport sector o kaha kon dunay bakante sa mga buhatan mahimo nga patrabahoon.

Maayo kong ingon niini kay mag-unsa naman lang intawon ang kaldero sa daghang mga driver nga walay pangita, unsay ipakaon sa ilang pamilya?

Sa kabahin sa mayor gihimo niya ang tanan nga makabalik sa panginabuhian ang mga driver ug operators apan anaa ra gihapon ang tanan nga hukom sa LTFRB.

Miyembro ang LTFRB ug LTO sa Adhoc Committee apan ang national government gihapon ang mohukom kong matugotan ba gyud ang mga traditional PUJ.

Huwaton nato ang resulta niini sunod buwan kong makaarangkada na ba ang mga kinaraan nga sakyanang pampubliko sa kadalanan.

Sa pagkakaron kuwang gihapon ang public transportation sa dakbayan sa Sugbo bisan og naa na ang mga bus ilabi na nga giluagan na ang ekonomiya. Busa makatabang usab unya ang presensya sa mga PUJ ug sa samang higayon makatabangan usab sila sa pagbangon sa ilang panginabuhian.