Kampanya batok corruption

Usa ka mega-task force nga pangulohan ni Justice Secretary Menardo Guevarra maoy gitahasan ni Presidente Rodrigo Duterte pag-imbistigar sa corruption sa mga buhatan sa gobyerno. Mamahimong sentro sa imbestigasyon mao ang PhilHealth ug Department of Public Works and Highways kon DPWH.

Apan matud ni Duterte ang tanang ahensiya sa gobyerno lakip sa imbistigahan sanglit buot niyang ang pangurakot diha sa gobyerno masulbad sa dili pa siya mokanaug sa katungdanan sa tuig 2022.

Giangkon ni Duterte nga hangtud karon nagpadayon ang pangurakot diha sa gobyerno. Admitido siyang wala mobahar ang corruption sukad siya milingkod sa pwesto moupat ka tuig na ang nakalabay, hinunoa mas nisamot pa ang pangurakot.

Buot ang presidente nga manubag ang mga kurakot nga mga opisyal pinaagi sa pagpasaka og kaso batok nila. Husto ang direksiyon sa presidente ug angayang suportahan sa publiko pinaagi sa pagsumbong sa mga kurakot nga opisyal ug kawani sa kagamhanan.

Apan angayang puy-an sab sa presidente ang matagpulong nga iyang litukon aron pagpakita nga siya sinsiro sa iyang mga saad panahon sa kampanya. Dihang gitanyag ni Duterte iyang kaugalingon isip kandidato niadtong 2016, iyang gipasalig nga sulbaron ang problema sa drugas sulod lang sa tulo ngadto sa unom ka buwan. Gisaad sab niya ang pagsanta sa corruption sa gobyerno hinungdan nga makabungog nga mayoriya ang gihatag sa publiko nga napul-an na sa maong mga problema ngadto niya.

Napakyas man siya pagtuman sa saad nga sulbaron ang problema sa drugas sulod sa tulo ngadto sa unom ka buwan, apan dili ikalimod nga dako og kausaban nga nahimo ang iyang administrasyon sa kampanya batok sa illegal nga drugas.

Niining kampanya sa corruption nga maoy iyang bag-ong gitutokan, hinaut nga patas ang tanan ug way “sacred cow” sa iyang administrasyon.

Ug agi og pagpakita og maayong ehemplo, mas labing maayo og si Duterte ug ang mga sakop sa iyang gabinete boluntaryong mosubmitir sa ilang kaugalingon sa inbestigasyon.

Wala ko magduda sa kaligdong sa presidente, apan mas dunay kridibilidad ang iyang kampanya batok sa corruption kun siya mismo mag-una pagpaubos sa iyang kaugalingon sa lifestyle check pinaagi sa pagpublikar sa iyang Statement of Assets Liabilities and Networth (SALN) ingon man ang tanang sakop sa iyang official family.

Dili sab makatabang sa imahin sa iyang kampanya ang pagpunay niya og depensa ni DOH Secretary Francisco Duque III nga maoy chairman sa PhilHealth ingon man ni DPWH Secretary Mark Villar.