Tambal sa kurapsyon

Samtang gihangop sa uban ang kamandoan ni Presidente Duterte sa usa ka halapad nga imbestigasyon sa kurapsyon sa tibuok burukrasya sa kagamhanan, alang sa uban, sama ra og guba’ng plaka ang Presidente ni’ng iyang pamahayag og nga ang imbestigasyon angay nga magsugod kaniya pinaagi sa pagpagawas sa iyang SALN. Pagpakabana sa katawhan ug ang kasihag (transaparency) sa mga kalihokan sa gobyerno ang tambal sa kurapsyon.  Matud pa bitaw ni Indira Gandhi, “Pagbantay kamo sa mga opisyales nga wala’y mabuhat kon walay kwarta, ug labaw’ng bantayi kadtong buot buhaton ang tanan pinaagi sa kwarta”.  Kakuyaw tinuod!

Road-right-of-wrong

Gikataho nga ang kagamhanan migasto na’g binilyon ka pesos alang sa Road Right-of-Way (RROW) acquisition, apan daghan pa gihapon nga mga mahinungdanong proyekto ang pabilin nga nalangan tungod sa suliran sa righ-of-way.  Alang kang Senador Lacson, angayan kining apilon ug tutokan sa Task Force nga moimbistigar sa kurapsyon sa kagamhanan.  Daghang kasaypanan ang nabuhat sa maong kalihukan sa gobyerno.  Angayan tingale nga nganlan na lang kini ug Road Right-of-Wrong.  Fezteleern!

Mas bug-at ang pagbasol

Gimando na sa kagamhanan nga sirad-an ang mga sementeryo sugod sa Oktobre 29 hangtud Nobyembre 4. Tungod niini, mopakatap ang kapolisan og 1,627 ka mga polis nga ibahin-bahin sa 415 ka mg sementeryo sa tibouok Central Visayas atol unya sa Adlaw sa mga Minatay. Kini aron malikayan ang pagtapok sa daghang tawo nga mamahimong hinungdan sa pagkatap sa coronavirus.  Namatud-an na nga daghan gayod ang mohalad ug mohatag og bulak n gadtosa mga minatay kay sa mga buhi pa.  Tungod ba kaha kay “mas bug-at sa kasing-kasing ang pagbasol kay sa pagpasalamat”? Madahaan!

Dako gihapon ang gasto

Matud pa sa tigpamâbâ sa Commission on Elections nga si Commissioner James Jimenez, nangandam na ang ilang buhatan sa umaabot nga eleksyon karong Mayo 2022 apan tungod sa pandemic, adunay posibilidad nga diyotay ra ang mga botante nga mosalmot sa piniliay. Bisan pa kon matinuod ang giingon ni Jimenez, dili kini magkahulogan nga momenos ang galastohan sa kandidato. Tungod sa sistema sa pinalitay sa boto, tanan botante, mobotar man o dili, iphon lang gihapon sa politikanhong partido.  Vote buying pa more!

Hangopon ang trapik

Tugotan na sa Dakbayan sa Sugbo nga mobiyahe sa kadalanan ang 1,720 ka mga tradisyonal nga mga jeepney, human moduso ang Task Force nga gipangulohan ni Konsehal James Cuenco sa resulta sa ilang pagtuon niini.   Makapaabot kita nga, tungod sa jeepney, mograbe ang kahuot sa trapiko sa kadalanan, apan sabton usab nato nga kinahanglanon sa katawhan ang maong sakyanan ug nga adunay mga pamilya nga nagsalig sa ilang panginabuhian niini.  Matud pa bitaw sa pagya, “Kon nagkinahanglan ka og ulan, kinahanglan hangpon nimo pag-apil ang lapok nga moresulta tungod niini”.  Arangkada na!