Mag-inspection ta

Ang maayong buhaton sa mga opisyal sa Cebu City mao ang paghimo’g actual inspection sa sapa nga anaa magsubay kilid sa 138 Mall sa Colon Street ug nagsubay sa ilawom sa mga building dihang dapita.

Awhagon nako si Konsehal Jerry Guardo, kay siya man ang gisaligan ni Mayor Edgar Labella kabahin niining mao nga isyu, nga maoy mopasiugda sa paghimo’g actual inspection, ug pwede gani nga ila kong imbitahon.

Ang tuyo nako niini mao nga makasabot gyud sila nganong molunop ang dalan Colon ug ubang bahin sa downtown area kon mobunok na ang ulan. Nagduda ko nga wa kaayo sila masayod sa tinuod gyud nga isyu.

Kon makauban ko, ako silang pasabton ngano nga ang gihimong “box culvert” o sapa nga gitabonan lang nga anaa magsubay sa Colon Street ug gipaliko sa D. Jakosalem, ug gigastohan og subra P50 Milyones, mahulog ra sa pag-usik-usik sa kwarta.

Kaniadtong miaging adlaw, miadto gyud ko sa maong dapit ug gianinaw nako pag-ayo ang sitwasyon. Para nako, nagkinahanglan gyud nga ang pagsulbad sa baha dinhi sa dakbayan, tutokan gyud pag-ayo.

Unya, kinahanglan nga ang mga opisyal sa Cebu City government, dili mahadlok nga mohimo’g lakang aron panggub-on ang mga infrastructure project nga nakaali sa tubig-baha kon may kusog nga ulan.

Kaniadto, paglingkod gyud sa katungdanan ni Mayor Michael Rama, bug-at ang iyang tingog nga panggub-on kuno niya ang mga straktura nga nakatampo sa pagkagamay sa sapa.

Gani, mga dagkong building diha sa kilid sa gitawag kaniadto og Estero Parian (karon Parian Creek), kanang sapa nga nag-agi ilawom sa mga building sa Colon, gipangmarkahan na kon asa kutob ang gub-onon.

Apan nahuman na lang ang tulo ka tuig nga termino ni Rama, wa gani siya makahimo og lakang bisan sa pagpasaka na lang og kaso sa mga tag-iya sa building nga mi-encroach ug miapil sa sapa sa ilang estraktura.

Kaniadtong miaging adlaw, gisusi nako kadtong gibutang nga badlis pinaagi sa pintal, wa na nako makita kay gikuskus na sa mga tag-iya sa building.

Unta, makabaton og political will ang administrasyon sa akong amigo nga si Mayor Edgar Labella nga panggub-on kining nakalapas sa three-meter easement gikan sa sapa.

Tinuod, dunay mahiubos kang Mayor Labella kon iya kining himoon, apan mas daghan ang mopagakpak ug moyukbo kaniya sa dalaygon niyang lihok.

Kon masulbad ni Mayor Labella ang dugay na kaayong problema sa lunop sa downtown area kon mag-uwan, bisan kinsa pa ang moatbang kaniya, siguradong mapilde.  Si kanhi mayor Tomas Osmeña nagbalik-balik na lang sa City Hall ug si kanhi mayor Rama, apan wa makasulbad sa lunop-baha sa downtown kon mag-uwan.