Challenge accepted

Lisod ug tungason pa kaayo ang hagit ni COVID-19 Overseer Roy Cimatu nga himoong zero case ang dakbayan sa Sugbo.

Apan walay imposible kong magkahiusa ang tanan alang sa maong katuyoan.

Niadtong miaging semana, mibalik si Cimatu sa Cebu City dili tungod kay i-manage ang kaso sa COVID-19 kondili iyang gipaabot ang pasalamat og pagdayeg tungod kay miubos na gyud ang kaso sa virus sa dakbayan.

Dungan niini ang hagit niya nga himoong COVI-free ang syudad subay sa dako kaayo niyang pagsalig sa mga Sugboanon.

Lisod man apan gidawat ni Mayor Edgardo Labella ang hagit kay alang man usab kini sa kaayohan sa tanan.

Tinuod imposible sa pagkakaron apan walay kumo sa pamasin nga makab-ot kini pinaagi sa kooperasyon sa tanan.

Unahon sa mayor ang mga barangay nga maoy frontliner sa pag-manage sa mga tawo.

Mitanyag ang mayor og P100,000 sa matag barangay nga wala nay covid transmission, makaya kaha ni?

Kaya kaayo tungod kay sa kasamtangan aduna nay 45 ka mga barangay ang zero COVID transmission ug kong nahimo nila walay rason nga dili mahimo sa ubang mga barangay.

Napamatud-an na sa Cebu City ang katakos niini sa paghimo sa mga daw imposible ngadto sa posible sama sa liboan ka mga nagpositibo sa virus kaniadto apan karon kapin sa 200 nalang ang active cases.

Apan unsa kaha ang pamaagi niini? Unsa ka segurado nga mamonitor gyud ang tanang molupyo sa  barangay?

Hinuon dili seguro isugal sa mga barangay ang pagtago sa kamatuoran aron lang makakuha sila og incentive gikan sa City Hall.

Sugdan ang reward system sa Nobiyembre 1 hangtod na sa kataposan sa Disyembre, ug seguro kini nga makaani na usab og pagsaway gikan sa mga kritiko.

Ang pagsanong sa mayor sa hagit ni Cimatu dili lang compliance kay dili man usab pinugsanay kon dili gihimo kini sanglit positibo ang panglantaw niya nga makab-ot namo ang gitinguha nga COVID-free.

Kanindot kaha kong mahitabo kini. Apan moingon ko mahitabo kini kong mokooperar ang tanan dili lang ang mga tawo ug mga opisyal, apil na ang kadtong mga kritiko.

Ang dakbayan sa Sugbo ang unang miburot ang COVID-19 ug hinaut nga kita mauna nga mahimong virus-free gawas lang seguro sa Siquijor.

Dawaton nato ang hagit nga makaangkon og kagawasan gikan sa virus.