PhilHealth ang sisihin huwag ang Red Cross
Ang Philippine Red Cross ang nabubuntunan ng sisi sa mga nangyayaring aberya sa pagsasagawa ng COVID testing. Alam ng lahat na napakamahal ng mga test kits at namumuhunan ang PRC upang makatulong sa pagsasagawa ng testing sa mga taong posibleng dinapuan ng sakit.
Ang pamahalaan ang sumasagot sa gastusin sa pamamagitan ng PhilHealth. Iyan ang kasunduan ng gobyerno at PRC na isang non-profit international organization na ang misyon ay mga gawaing panaklolo sa harap ng mga kalamidad tulad ng digmaan, natural calamities at pandemya tulad ng dinaranas ngayon ng daigdig.
Inatasan na nga ng Pangulo ang PhilHealth na bayaran ang utang at nangako naman ang ahensya na ito’y magbabayad na. Pero hanggang ngayon, dismayado si Sen. Dick Gordon na siyang namumuno ng PRC dahil wala pang ibinabayad ang PhilHealth sa mahigit P1 bilyon pagkakautang nito.
Kahit pa isang institusyong pang-kawanggawa ang PRC, paano nito maitutuloy ang pagsasagawa ng mass testing kung walang pondo para bumili ng napakamahal na test kit? Sa ngayon, mangangailangan ng lima hanggang walong milyong dolyar para mapunan ang supply nila ng test kits.
Ano ba itong PhilHealth? Basta katiwalian, may nilulustay na pera pero pagdating sa mahigpit na pangangailangan ng mga mamamayan, hindi nakapagbabayad ng obligasyon.
Hoy, magbayad na kayo!
- Latest