Kaminyoon sa kaparihas

Unsa man ka tinuod ang nabalita ug nabaniog sa tibuok kalibotan nga giindorso sa Santo Papa ang civil union sa magkaparihas o mga sakop sa Lesbian Gay Bisexual transgender (LGBT). Ang nahisgotang balita nakapakugang ug nakapaisa sa kilay sa mga konserbatibo.

Kining maong balita baliktad sa baroganan sa Santo Papa sa dihang siya pa ang arsobispo sa nasud sa Argentina.

Human migawas ang kontrobersiyal nga balita, nagpusot-pusot usab ang mga balita nga nag ingon nga misquoted lamang ang Santo Papa sa iyang pahayag samtang ang uban miingon nga giputol ang pahayag sa Santo Papa aron molutaw nga miuyon kini sa same-sex civil union.

Kun matinuod man o dili ang giingon nga pahayag sa Santo Papa, dili pa angayan nga maglipay ang mga sakop sa LGBT tungod kay layo pa sa tinuod ang katumanan sa ilang pangandoy.

Dinhi sa Pilipinas gikinahanglan pa nga usbon sa Kongreso ang kahulogan sa kaminyoon o marriage. Kini tungod kay ang kahulogan sa kaminyoon sa Pilipinas usa ka special nga kontrata sa permamente nga panaghiusa tali sa babaye ug lalaki nga ilang gisudlan pinasubay sa balaud alang sa pagpabarog ug usa ka conjugal ug kinabuhing pamilyado.

Sa Pilipinas nga kon wala ko masayop 85 porsiyento mga Katoliko ug ang mga sakop sa Ubos Balay Balauranan ug Senado kadaghanan kanila mga Katoliko. Maingon nato nga subidahon ang pagtugot sa kaminyoon sa magkaparehas o LGBT.

Dakong lantugi ang maagian sa same-sex civil union kun ugaling matuki man kini sa Kongreso diin gawas sa isyu sa moralidad laing mahimong basihanan sa lantugi ang prinsipyo sa separasyon sa estado ug simbahan.

Ang same-sex civil union maingon nato nga lig-on nga basihanan nga ang simbahan mitamod sa prinsipyo sa separasyon sa estado ug simbahan. Kini kun sabton nato nga tinuod ang pahayag sa Santo Papa.