Giusikan lang ang kwarta

Dugay na kaayo ko nga nag-ingon nga ang paggasto sa Department of Public Works and Highways (DPWH) og kapin sa P50 milyones sa paghimo’g sapa nga anaa magsubay sa Colon Street, dili gyud makasulbad sa paglunop diha sa downtown.

Ang tinuod, pipila ra ka opisyal sa dakbayan sa Sugbo ang nahibawo nga ang DPWH naghimo’g sapa diha sa Colon Street aron lang gyud magasto nila ang dakong pundo nga gitagana sa national government alang sa drainage project dinhi sa siyudad.

Kon may mga opisyal pa sa siyudad nga nagpakabana niining mao nga proyekto nga nag-usik-usik lang sa kwarta sa katawhan, tingali, mababagan ang maong paghimo’g sapa. Apan bisan ang mayor kaniadto nga si Tomas Osmeña wa masayod.

Ang konsehal nga gitugyanan ni Osmeña sa pagsuperbisar sa mga infrastructure projects, utro pa nga wa masayod kay diha nga akong gihisgotan kaniya ang proyekto, mora’g ikatandi nato sa tawo nga bag-o pa nga nahigmata.

Dili ko engineer, apan sigurado ko nga kon himoan nako og sketch kon giunsa sa DPWH ang paghimo’g sapa diha sa Colon Street aron kuno pagsulbad sa baha, kadtong mga maayo’g pangisip mosuporta sa akong argumento.

Ang tumong sa DPWH sa paghimo’g sapa nga anaa gihimo nila sa Colon, mao ang pagpaliko kuno sa tubig nga gikan sa sapa nga nagagikan sa Sanciangko Street ug sa Barangay Kamagayan.

Gitan-aw nila nga ang maong tubig gikan sa Junquera Street maoy rason nga maglunop ang downtown kay mosuyla man ang Parian Creek, kanang sapa nga anaa magsubay sa ilawom sa mga tindahan diha sa Colon.

Ang akong argumento, ingon niini. Ang tubig nga gikan sa Junquera, gusto sa DPWH nga moliko kini paingon sa gihimo nila nga sapa, inig-abot diha sa Colon.

Oki, dinhi hinuktuki ninyo pag-ayo. Moliko ba diay ang bul-og sa tubig nga buylo man kaayo kini nga mosubay kilid sa 138 Mall, kay ang sapa nga ilang gihimo, nagporma man og “eskwala” paingon sa left?

Diha nga bahina, nakapangyam-id ko sa mga engineer sa DPWH nga naghimo sa mao nga plano ug may pagduda ko ngano nga gipugos nila paghimo ang maong proyekto.

Usbon nako, daghan kaayo sa mga opisyal sa siyudad ang wa masayod nga may sapa ba diay nga gihimo ang DPWH diha sa Colon.

Pero ako, nasuheto ug bisan ipatudlo nila hain kini magsubay, suheto ko.

Makapasabot ko ngano nga dili kini makasulbad sa pagbaha ug paglunop sa downtown area. Naghalhal lang mo!