Hagit ni Cimatu
Human hagita ni Secretary Roy Cimatu nga paningkamutang mamahimong “zero COVID-19 case” ang dakbayan sa Sugbo, gipahibawo ni Mayor Edgardo Labella nga iyang hatagan og P100,000 ang matag-barangay nga way matalang kaso sa COVID sugod Nobyembre 1 hangtud sa Disyembre 31.
Disidido ang mayor nga tubagon ang hagit ug nga makab-ot lang kini kun ang tanang barangay moabag pagsiguro nga matuman ang tanang mga lagda pagbadlong sa tinakdanay.
Sa kasamtangan 43 sa 80 ka mga barangay sa dakbayan sa Sugbo ang way kaso COVID, sagad niini mga bukirang barangay.
Lisud apan dili imposible nga mabadlong sa hingpit ang pagkatap sa sakit kun ang tanan motuman sa mga lagda.
Ang estrikto nga pagbantay sa mga awtoridad dako og ikatabang aron molampos ang maong tinguha.
Si PRO-7 director Albert Ignatius Ferro mihangop sab sa hagit ni Cimatu ug misaad nga padayonon sa kapolisan ang hugot nilang pagbantay sa mga malapason sa quarantine protocols.
Kun abagan sa mga barangay ang kapolisan dako ang posibilidad nga makab-ot gyud sa dakbayan ang “zero COVID case” sa dili pa matapos ang tuig.
Ang P100,000 nga gisaad ni Labella isip incentives ngadto sa mga barangay makatabang ni pagdasig nila nga kanunay’ng magmabinantayon.
* * *
Sa kasamtangan maayo og performance ang dakbayan pagpugong sa tinakdanay.
Gani gihatagan ni Cimatu og perfect score ang Cebu City sa mga programa niini pagresponde sa COVID-19.
Si Cimatu nga maoy gitahasan pagsupervise sa COVID-19 response dinhi sa dakbayan miingon nga natagbaw siya sa gihimo sa dakbayan sa Sugbo.
Napakunhod niini ang gidaghanon sa mga kaso sa COVID-19 ug nahaw-as ang dakbayan gikan sa listahan sa mga dapit sa nasud nga dunay labing daghang active cases.
Tingali bisan ang mga kontra sa politika ni Labella dili mosupak sa score nga gihatag ni Cimatu sa dakbayan.
Wala hinuoy bugtong tawo nga makapangangkon og kridito sa maong kalampusan.
Kini tungod kay ang pagbadlong sa tinakdanay sa sakit maisip nga hiniusang kadaugan sa tanang mga molupyo ug mga opisyal sa dakbayan sa Sugbo.
- Latest
