EDITORYAL - Epicenter kaniadto, modelo karon

Gikan sa pagka- epicenter of Covid-19 niadtong bulan sa Hunyo hangtud sa Hulyo, ang Cebu City na karon maoy gitawag nga “modelo” para sa kampanya batok sa maong sakit ug gustong sun-on sa ubang local government units alang sab sa ilang COVID-19 response.

Pipila ka bulan na ang nakalabay, ang Sugbo nahimo pang sumsoman sa pagtamay ug pagbiay-biay diha sa social media tungod sa pagsaka sa mga kaso sa COVID-19 niini.

Nahitabo kadto sa dihang gikan sa Enhanced Community Quarantine (ECQ) gikan sa Abril hangtud sa Mayo, gipaubos sa General Community Quarantine (GCQ) ang siyudad.

Tungod sa pila ka bulang pagkatanggong sa mga tawo diha sa balay tungod sa stay at home policy sugod sa bulan sa Marso agi og pamaagi pagpakgang sa pagkatap sa virus, daw nakabuhi nga mga kabayo sa toril ang mga tawo.

Gatosan ang pagsaka sa gidaghanon sa mga kaso ug naabot sa punto nga matud pa sa mga kadagkoan sa Department of Health nabutang sa peligro ang health care system sa Sugbu kay kada adlaw ang pagabot sa mga pasyente sa mga tambalanan niini.

Hasta ang kapabilidad ug kredibilidad sa mga opisyales sa siyudad pinangulohan ni Mayor Edgardo Labella, mga pamaaging ilang gihimo gikwestyon sa mga kritiko niini ug nahimong sumsoman sa political social media pages nga klaro sab hinuon kaayong dili may political interes ang mga komentaryo.

Hinuon, inay nga mokisikis ug rumbohon ang mga kritiko gipadayon sa siyudad ang sa ilang tan-aw maoy hustong buhaton pinasubay sa rekomendasyon sa ubang mga ahensiya sama sa DOH.

Tungod sab sa paganhi ni Sec. Roy Cimatu mas napalig-on sa mga gipuno niini nga mga pamaagi og sistema ang gipangbuhat na sa Cebu City. Mikubos og maayo ang mga kaso ug nakabangon ang nameligrong health care system sa rehiyon.

Karon makangislit na sa hilom ang mga tawong gitamay ug gibiay-biayan sa panahong nagkapuliki ang siyudad sa COVID-19. Basta magpadayon lang gyud ang kooperasyon sa mga tawo pagsunod sa minimum health protocols, luwas ang komunidad sa subling pagkatap sa virus.