Pabor ug korapsiyon

Giimbitar sa lokal nga kagamhanan sa dakbayan sa Sugbo ang mga tag-iya og mgas estraktora nga naa nahimutang daplin sa kasapaan dinhi sa dakbayan sa Sugbo human sila tumboka nga maoy usa sa hinungdan sa grabeng mga pagbaha.

Sa ihap nga gihimo sa taga-Office of the Building Official hapit moabot sa usa ka gatos ka mga istraktora ang gipangtukod kilid sa sapa ug sa sapa mismo.

Sige lang og balik-balik estorya ang ato lokal nga mga opisyal sa dakbayan sa Sugbo bahin sa mga estraktora nga gipangtukod daplin sa kasapaan. Sige panganti og silot pero hangtod karon wa gihapon nasilotan nga mga tag-iya og dagko nga istraktora. Maayo lang ni sila mopaguba sa gagmay nga estraktora tungod kay wa may sarang nga ikasukol. Sa makapabor lang.

Ang inpluwensiya ug korapsyon maoy naghatag og pabor sa mga tag-iya og mga dagkong estraktora nga gitukod daplin sa kasapaan ug gani ang uban mitabon na gayod sa sapa sama dakong tindahan diha sa may dalan Colon.

Kun dili pa tungod sa inpluwensiya ug korapsyon dili matukod ang mga dagkong estraktora diha sa kasapaan tungod kay ang mga enhenyero nga magtukod og building nasayod nang daan nga dili sila poyde nga magtukod niini sulod sa easement zones.

Kun ugaling malinga ang mga enhenyero aduna pod Office of the Building Official nga makasuta ug makapaguba sa mga istraktora nga gitukod nga wala masubay sa balaud.

Karon lisod nang maguba ang mga estraktora ilabi na ang gipanag-iya sa mga adunay tingog sa katilingban. Tungod kay sayod kita nga mas palabihon pa nila nga mosuborno kay sa maguba ang ilang istraktora.

Good luck na lang sa gobyerno ni Mayor Edgardo Labella.