EDITORYAL - Walang nakasingitna ‘pork’ sa budget
Malinis at walang naka-insert na pork barrel sa 2021 General Appropriations Bill na inaprubahan ng House of Representatives noong Biyernes. Ito ang tiniyak ng bagong House Speaker Lord Allan Velasco. Makaaasa raw ang lahat na walang nakasingit sa proposed P4.5 trilyong national budget. Sana nga ay totoo ito.
Matatandaan na muntik pang maatrasado ang deliberasyon ng national budget dahil sa mga nangyaring “drama” sa Kamara. Nagkaroon ng problema sa term sharing sina dating House Speaker Alan Peter Cayetano at Marinduque Representative Velasco. Nagtagisan muna ang dalawa bago naayos ang gulo. Kailangan pang pumagitna ang Presidente bago kumalma ang “bagyo” sa Kamara. Mabuti at parehong tumalima ang dalawa at kinalimutan ang hidwaan.
Nagtrabaho agad si Velasco pagkaraang humupa ang unos. At natapos nga sa loob lang ng ilang araw ang deliberasyon ng budget. Sa isang linggo ay nakatakda na nila itong i-transmit sa Senado. Unang target ni Velasco ay sa Nobyembre 5 pa ito ipadadala sa Senado pero umalma na si Senate President Tito Sotto at sinabing mahihirapan na silang aprubahan ito.
Inaabangan ngayon kung wala nga bang isiningit ang mga mambabatas sa inaprubahang national budget. Totoo kaya ang sinabi ni Velasco? Kumalat kasi ang alegasyong tadtad ng pork insertions ang ipinasang budget. Nang tanungin si Velasco kung na-adjust ang budget ng Department of Public Works and Highways (DPWH) sa Taguig at Camarines Sur para sa pantay na distribusyon, sinabi ni Velasco na wala silang pinakialamang funding. Kinuwestyon kasi ng mga mambabatas sa House deliberations ang malaking alokasyon para sa infrastracture projects sa ilang legislative districts gaya sa Taguig City at Camarines Sur.
Sana nga ay walang nakasingit na pork sa 2021 budget. Ang mga ganitong isiningit na pork ang pinagmumulan ng katiwalian. Kung walang pork, makaaasang walang makukurakot. Sana nga ay malinis at walang pork insertions sa 2021 budget. Matibay na pinanghahawakan dito ang mga salita ni Velasco.
- Latest